Institut for Economics & Peace (IEP) томонидан эълон қилинган “Глобал Пеаcе Индех 2026” натижаларига кўра, Ўзбекистон 163 мамлакат орасида тинчликсевар мамлакат сифатида 37-ўринни эгаллади. Мамлакатнинг рейтингдаги умумий кўрсаткичи 1,726 баллни ташкил этди. Эътиборлиси, бир йил олдин мамлакатимиз 67-ўринда қайд этилган эди.
Ўзбекистон хавфсиз ва барқарорлик даражаси бўйича Марказий Осиёда етакчи деб эътироф этилди. Минтақа мамлакатлари орасида Қозоғистон 44-поғонани, Тожикистон — 47-поғонани, Қирғизистон — 61-поғонани, Туркманистон эса 66-поғонани эгаллади.
Индекс мамлакатлардаги тинчлик ва барқарорликни 23 та кўрсаткич асосида баҳолаб, уларни 3 та асосий йўналишга бирлаштиради:
Жамият хавфсизлиги ва осойишталиги (Safety and Security) — мамлакатдаги жиноятчилик, ижтимоий хавфсизлик, сиёсий беқарорлик, терроризм таъсири, аҳоли хавфсизлиги билан боғлиқ кўрсаткичлар;
Давом этаётган ички ва ташқи можаролар (Ongoing Domestic and International Conflict) — ички ва халқаро низолар, можароларнинг давомийлиги ва интенсивлиги, ташқи конфликтларга жалб этилганлик каби омиллар;
Милитаризация даражаси (Militarisation) — ҳарбий харажатлар, қуролли кучлар, ҳарбий салоҳият ва бошқа мудофаа билан боғлиқ кўрсаткичлар.
Шу жиҳатдан, рейтинг мамлакатнинг нафақат ички хавфсизлигини, балки тинчлик ва барқарорликнинг кенг қамровли ҳолатини акс эттириб, мамлакатнинг туристик жозибадорлигини белгилайдиган муҳим омиллардан бири.
Халқаро тадқиқотлар туристларнинг манзил танлаш жараёнида хавфсизлик, терроризм, жиноятчилик ва сиёсий беқарорлик билан боғлиқ хавфларни инобатга олишини кўрсатади. Айниқса, хавфни юқори баҳолайдиган туристлар хавфсизлик даражаси юқори бўлган йўналишларни танлашга мойил.
Шу нуқтаи назардан, Ўзбекистоннинг Global Peace Indexда 37-ўринни эгаллаши мамлакатнинг халқаро туристик имиджи учун муҳим ижобий омил ҳисобланади.
