Терма жамоа аъзолари муҳим мусобақа олдидан жисмоний ва тактик тайёргарликни янада кучайтириш мақсадида ҳар куни интенсив машғулотлар олиб бормоқда. Машғулот жараёнларида жамоадаги юқори кайфият, интизом ва ғалабага бўлган ишонч яққол кўзга ташланади.
Бизнинг ижодий жамоа ҳам йиғин жараёнларида иштирок этиб, футболчиларнинг машғулотларини яқиндан кузатди. Машғулотлар давомида футболчиларнинг юқори темпда ҳаракат қилиши, бир-бири билан ўзаро тушунишга асосланган комбинацион ўйинлари ва ҳар бир машққа жиддий ёндашуви эътиборни тортди.
Терма жамоа машғулотларига бош мураббий Фабио Каннаваро шахсан раҳбарлик қилмоқда. Италиялик мутахассис футболчилар билан асосан тактик ва жамоавий ҳаракатлар устида иш олиб бормоқда. Айниқса, ҳужум ва ҳимоя ўртасидаги мувозанат, тезкор қарор қабул қилиш, қарши ҳужумларни ташкил этиш ҳамда майдондаги ўзаро уйғунликка алоҳида эътибор қаратилмоқда.
Машғулотларда футболчиларнинг жисмоний ҳолати ҳам юқори даражада экани сезилмоқда. Терма жамоа аъзолари ҳар бир машқни юқори кайфият ва катта масъулият билан бажармоқда. Жамоада соғлом рақобат муҳити шаклланган бўлиб, ҳар бир футболчи асосий таркибдан жой олиш учун бор имкониятини ишга солмоқда.
Маълумот ўрнида айтиш жоиз, терма жамоамиз 5–26 май кунлари Миллий футбол марказида навбатдаги йиғинини ўтказмоқда. Ушбу йиғин доирасида учта ўртоқлик ва назорат учрашувлари ўтказиш режалаштирилган. Жами 40 нафар футболчи йиғинга жалб қилинган бўлиб, дастлабки машғулотлар 30 нафар футболчи иштирокида бошланди. Хориж клубларида фаолият олиб бораётган легионер футболчилар эса босқичма-босқич жамоа сафига келиб қўшилмоқда. Шунингдек, жароҳатидан тикланаётган 6 нафар футболчи ҳам йиғинда иштирок этиб, махсус дастур асосида тайёргарлик олиб бормоқда.
Жорий йилнинг 17 май куни Ўзбекистон миллий терма жамоаси “Нефтчи” клубига қарши назорат ўйинида майдонга тушди. Ёпиқ эшиклар ортида бўлиб ўтган баҳсда миллий терма жамоамиз 3:0 ҳисобида ғалаба қозонди. Ушбу учрашувда мураббийлар штаби барча футболчиларнинг имкониятларини синовдан ўтказиб, уларга ўйин амалиёти тақдим этди.
Учрашувда киритилган голларга Азизбек Амонов 6-дақиқада, Фарруҳ Сайфиев 21-дақиқада ҳамда Достон Ҳамдамов 47-дақиқада муаллифлик қилди. Баҳс давомида футболчиларнинг юқори ҳаракатчанлиги, тезкор комбинациялари ва тактик интизоми эътиборга молик бўлди.
Учрашувдан сўнг “Нефтчи” дарвозабони Ботирали Эргашев ҳам ўз фикрлари билан ўртоқлашди. Унинг таъкидлашича, миллий терма жамоага қарши баҳс ҳар бир футболчи учун катта тажриба вазифасини ўтайди.
— Ўзбекистон миллий терма жамоасига қарши ўйин биз учун яхши синов бўлди, — деди Ботирали Эргашев. — Терма жамоа футболчилари юқори темпда ҳаракат қилди. Бундай баҳслар клуб футболчилари учун ҳам муҳим тажриба ҳисобланади.
Шунингдек, учрашувда гол муаллифларидан бири бўлган “Динамо” ҳужумчиси Азизбек Амонов ҳам йиғин ва баҳс ҳақида ўз фикрларини билдирди.
— Жамоада муҳит жуда яхши. Ҳар бир футболчи йиғинда ўзини кўрсатишга ҳаракат қилмоқда, — деди Азизбек Амонов. — Бугунги ғалаба эса тайёргарлик жараёнидаги меҳнатларимиз самараси бўлди. Олдимизда яна муҳим ўйинлар бор ва уларга жиддий тайёргарлик кўряпмиз.
Йиғин доирасида миллий терма жамоа 20 май куни “Пахтакор” жамоасига қарши навбатдаги назорат баҳсида иштирок этади. Ушбу учрашув орқали мураббийлар штаби футболчиларнинг функционал ҳолатини янада чуқур таҳлил қилиш, тактик схемаларни синовдан ўтказиш ва асосий таркибни шакллантириш имкониятига эга бўлади.
Шунингдек, Ўзбекистон миллий терма жамоаси июнь ойида халқаро ўртоқлик учрашувларида иштирок этади. Жамоа 2 июнь куни Канадага қарши, 8 июнь куни эса Нидерландия терма жамоасига қарши майдонга тушади. Ушбу баҳслар Жаҳон чемпионати олдидан терма жамоа учун муҳим синов вазифасини ўтайди.
Мутахассислар фикрича, йиғин ва халқаро ўртоқлик учрашувлари жамоанинг спорт формасини янада ошириш, футболчилар ўртасидаги ўзаро тушунишни мустаҳкамлаш ҳамда катта мусобақа олдидан зарур тажриба тўплашда муҳим аҳамият касб этади. Айни пайтда мухлислар ҳам миллий терма жамоадан катта натижалар кутмоқда. Футболчилар эса ишончни оқлаш ва юрт шарафини муносиб ҳимоя қилиш учун тайёргарликни юқори савияда давом эттирмоқда.
Зулхумор Акбарова
