Мазкур битим 2025 йил 15 ноябрда Тошкент шаҳрида имзоланган эди.
Ҳужжат икки давлат ўртасида трансчегаравий сув ресурсларидан оқилона ва адолатли фойдаланиш, уларни биргаликда бошқариш ҳамда давлатлараро аҳамиятга эга сув хўжалиги объектларининг ишончли ва хавфсиз эксплуатациясини таъминлашга қаратилган.
Битим доирасида Ўзбекистон ва Қозоғистон ўртасида трансчегаравий сув объектларини бошқариш бўйича ҳукуматлараро комиссия ташкил этилади. Комиссия умумий сув ресурсларидан фойдаланиш, давлатлараро гидротехника иншоотларини эксплуатация қилиш ва уларнинг хавфсизлигини таъминлаш билан боғлиқ масалаларни тизимли равишда кўриб чиқади.
Шунингдек, томонлар сув хўжалиги соҳасида ахборот алмашинувини такомиллаштириш, сув ресурсларини бошқариш бўйича ҳаракатларни мувофиқлаштириш ва ўзаро манфаатли ҳамкорликни янада ривожлантиришни кўзда тутган.
Битим трансчегаравий сув ресурсларидан самарали фойдаланиш, сув танқислиги билан боғлиқ хавфларни камайтириш, эҳтимолий келишмовчиликларнинг олдини олиш ҳамда минтақавий сув ҳамкорлигини мустаҳкамлаш учун муҳим ҳуқуқий асос бўлиб хизмат қилади.
Маълумот учун, Ўзбекистон ва Қозоғистон Сирдарё ҳавзасидаги трансчегаравий сув ресурсларидан биргаликда фойдаланади. Мазкур сув ресурслари ҳар икки мамлакатда қишлоқ хўжалиги экинларини суғориш, аҳолини сув билан таъминлаш, электр энергияси ишлаб чиқариш ва экотизимлар барқарорлигини сақлашда муҳим аҳамиятга эга.
Ўзбекистон Республикаси Ҳукумати билан Қозоғистон Республикаси Ҳукумати ўртасида имзоланган Трансчегаравий сув объектларини биргаликда бошқариш ва оқилона фойдаланиш тўғрисидаги битим Ўзбекистон томонидан тасдиқланган. 2026 йил 6 март куни Ўзбекистон Республикаси Президентининг “Халқаро шартномани тасдиқлаш тўғрисида”ги ПҚ-88-сон қарори қабул қилинган.
