Халқаро туризм компанияси Expedia Group маълумотларига кўра, июн ойида мамлакатга саёҳатлар билан боғлиқ қидирувлар сони ўтган йилнинг шу даврига нисбатан 54 фоизга ошган. Шу билан бирга, расмийлаштирилган бронлар сони ҳам кўпайган. Бу эса фойдаланувчиларнинг қизиқиши амалий саёҳат режалаштириш босқичига ўтаётганини кўрсатади.
Expedia Group онлайн саёҳатлар соҳасидаги дунёнинг энг йирик компанияларидан бири ҳамда халқаро туризм талаби бўйича энг ишончли маълумот манбаларидан ҳисобланади. Платформа таркибига Expedia, Hotels.com, Vrbo, Travelocity, Orbitz, CheapTickets, Hotwire ва бошқа брендлар киради. Expedia Group платформаларидан ҳар йили дунё бўйлаб 300 миллиондан ортиқ саёҳатчи фойдаланади. 2025-йил якунларига кўра, компания платформалари орқали амалга оширилган ялпи бронлар (gross bookings) ҳажми 100 миллиард АҚШ долларидан ошган. Йиллик бронлар ҳажми 400 миллиондан ортиқ тунашни ўз ичига олади. Компания дунёнинг 70 дан ортиқ мамлакатидаги 3 миллиондан зиёд жойлаштириш объектлари, авиакомпаниялар, туроператорлар ва бошқа туризм хизматлари етказиб берувчилари билан ҳамкорлик қилади.
Талабнинг ўсиши бронлашнинг асосий кўрсаткичларида ҳам ўз аксини топган. Июнь ойида Expedia Group орқали Ўзбекистонга саёҳатни брон қилган саёҳатчилар сони ўтган йилнинг шу даврига нисбатан 45,6 фоизга ошган. Харид қилинган авиачипталар сони 23 фоизга ошган.
Expedia Group платформалари фойдаланувчилари орасида Ўзбекистон учун асосий хорижий бозорлар АҚШ, Япония, Буюк Британия, Корея Республикаси, Германия ва Франция бўлиб қолмоқда. Талабнинг энг юқори ўсиш суръатлари АҚШ ва Японияда қайд этилган. Европа мамлакатлари орасида эса Буюк Британия, Германия ва Франция етакчилик қилмоқда.
Мамлакат ичидаги энг оммабоп йўналишлар орасида Тошкент, Самарқанд ва Бухоро етакчиликни сақлаб қолмоқда. Шу билан бирга, Хивага бўлган қизиқиш ҳам ортиб бормоқда. Сўнгги бир йил ичида шаҳарнинг умумий бронлар ҳажмидаги улуши сезиларли даражада ошгани унинг халқаро саёҳатчилар орасида тобора оммалашаётганидан далолат беради.
Дастлабки бронлар бўйича маълумотлар ҳам яқин ойларда юқори талаб сақланиб қолишини кўрсатмоқда. Эхпедиа Груп маълумотларига кўра, тасдиқланган барча бронларнинг 82,9 фоизи 2026 йил июль–сентябрь ойларига режалаштирилган саёҳатларга тўғри келади. Бу давр Ўзбекистондаги юқори туризм мавсуми арафасига тўғри келади.
Ўзбекистонга бўлган қизиқишнинг ортиши халқаро авиақатновлар географиясининг кенгайиши, сўнгги йилларда виза тартиб-таомилларининг соддалаштирилиши ҳамда мамлакатнинг хорижий туризм бозорларида фаол тарғиб қилинаётгани билан изоҳланмоқда.
