Тадбирда Ижтимоий ҳимоя миллий агентлиги масъул ходимлари, ҳамкор ташкилотлар вакиллари, оммавий ахборот воситалари ходимлари, спортчиларнинг яқинлари ҳамда кенг жамоатчилик иштирок этди. Маросим давомида чемпионларга агентликнинг эсдалик совғалари топширилди ва уларнинг тарихий ютуғи муносиб эътироф этилди.
Жорий йилнинг 28 – 31 май кунлари Польша Республикасининг Варшава шаҳрида меҳрибонлик уйлари тарбияланувчилари ўртасида футбол бўйича XI жаҳон чемпионати бўлиб ўтди. Нуфузли мусобақада дунёнинг 35 та жамоаси иштирок этди.
Ўзбекистон шарафини Тошкент шаҳридаги 22-сон меҳрибонлик уйи тарбияланувчиларидан ташкил топган жамоа ҳимоя қилди. Ёш футболчилар мусобақа давомида юқори маҳорат ва матонат кўрсатиб, еттита учрашувда ғалаба қозонди ҳамда финал баҳсида ҳам зафар қучиб, жаҳон чемпионлигига сазовор бўлди.
Бу натижа Ўзбекистоннинг меҳрибонлик уйлари тарбияланувчилари ўртасидаги футбол бўйича жаҳон чемпионатларидаги энг йирик тарихи ютуғи сифатида қайд этилди.
Ижтимоий ҳимоя миллий агентлиги масъул ходими Ўткир Намозбоевнинг таъкидлашича, Ўзбекистон жамоаси сўнгги йилларда мазкур йўналишда изчил натижалар қайд этиб келмоқда.
— 2022 йилда Россиянинг Санкт-Петербург шаҳрида ўтказилган халқаро турнирда жамоамиз иккинчи ўринни эгаллаган эди, — деди у. — 2023 йилги жаҳон чемпионатида ҳам кумуш медалларни қўлга киритган эдик. Бу йил эса илк бор жаҳон чемпионлигига эришдик. Ушбу ғалабадан кейин Европа давлатларининг қизиқиши янада ортди. Ҳозирда Португалиядан янги халқаро мусобақада иштирок этиш бўйича таклиф олинган ва расмий таклифнома кутилмоқда.
Жаҳон чемпионати ғолиби Шоҳрух Бегматов мусобақага тайёргарлик ва ғалаба ҳақида шундай фикр билдирди:
— Польшага Ўзбекистон номидан бориб, жаҳон чемпиони бўлиб қайтдик. Мусобақага бир ой давомида пухта тайёргарлик кўрдик. Бизга яратилган имкониятлар учун миннатдормиз. Бу ғалаба орқали мамлакатимиз шарафини муносиб ҳимоя қилишга ҳаракат қилдик. Келгусида ҳам янги ютуқларга эришиш учун астойдил меҳнат қиламиз.
Жамоа аъзоларининг айтишича, мусобақанинг энг мураккаб баҳслари Польша жамоасига қарши кечган. Ярим финалда мезбонлар пенальтилар сериясида мағлуб этилган бўлса, финалда ҳам Ўзбекистон жамоаси ишончли ўйин намойиш этиб, 1:0 ҳисобида ғалаба қозонган.
Жамоа капитани эса мусобақадаги энг унутилмас лаҳзалар ҳақида гапириб, гуруҳ босқичидан биринчи ўрин билан чиққанлари ва ярим финалда Польша жамоасини мағлуб этганлари энг катта ҳиссиётларни бахш этганини таъкидлади.
— Польшага қарши пенальтилар сериясида дарвозабонимиз бир нечта зарбани қайтарди, — деди у. — Биз билан бирга бошқа жамоалар, ҳатто Чехия терма жамоаси ҳам қувонгани биз учун катта мотивация бўлди. Бу руҳий кўтаринкилик финалда ҳам ғалаба қозонишимизга ёрдам берди.
Чемпионат давомида Ўзбекистон жамоаси нафақат жамоавий ўйини, балки алоҳида спортчиларининг маҳорати билан ҳам ажралиб турди. Турнир якунларига кўра, ишончли ҳаракатлари ва юқори савиядаги ўйини учун Максим Исломов мусобақанинг энг яхши дарвозабони деб топилди.
Ёш спортчилар мамлакатимизда спортни ривожлантириш ва ёшларни қўллаб-қувватлаш борасида яратилаётган шарт-шароитлардан мамнун эканликларини билдириб, ўзларига билдирилган ишончни оқлаганларидан фахрланишларини таъкидладилар. Айниқса, Польша осмонида Ўзбекистон давлат байроғи баланд кўтарилган лаҳзалар уларнинг ҳаётидаги энг унутилмас воқеалардан бири бўлганини қайд этдилар.
Польша Республикасининг Варшава шаҳрида ўтказилган меҳрибонлик уйлари тарбияланувчилари ўртасидаги футбол бўйича XI жаҳон чемпионатида қўлга киритилган мазкур тарихий ғалаба Ўзбекистон спорти ва ижтимоий ҳимоя тизимидаги ёшлар сиёсати самараларининг яна бир ёрқин намунаси бўлди.
Дунёнинг 35 та жамоаси иштирок этган нуфузли мусобақада мутлақ ғолибликни қўлга киритган ўзбекистонлик ёш футболчилар нафақат мамлакатимиз, балки халқаро спорт ҳамжамияти эътирофига сазовор бўлиб, миллий спорт тарихига яна бир ёрқин саҳифа ёздилар.
Зулхумор Акбарова
