Хусусан, билим олиш, касб-ҳунар эгаллаш, тил ўрганиш, иш топиш ва бизнес бошлашда қийинчиликка учраган 1,5 миллион ёшларнинг муаммоси “Ёшлар дафтари” орқали ҳал қилинди. Алоҳида дастурлар асосида жозибадор бизнес муҳити ва имтиёзли ресурслар натижасида ёш тадбиркорлар сони 5 карра кўпайиб, 287 мингдан ошди.
Ўқув марказларини кўпайтиришга қулай шароит яратилгани учун хорижий тилларни интенсив ўрганаётган йигит-қизларимиз 3,5 миллионга етди. Иқтидорли ўқувчи ва талабаларимиз нуфузли фан олимпиадаларида 434 та, ёш спортчиларимиз халқаро мусобақаларда 2 минг 245 та медални қўлга киритди.
Тарбияси оғир ёшларга ҳуқуқ-тартибот идоралари ва ҳокимлар бириктирилгани учун икки йилда ёшлар жиноятчилиги 2,5 карра камайди.
“Лекин бу – ёшлар билан боғлиқ барча масалалар ҳал бўлди, дегани эмас”, – деди давлатимиз раҳбари.
Ёшлар масалалари учун масъул идоралар, вазирлар, ҳокимлар, ректорлар, техникум ва мактаб директорлари ёшлар муаммоси, эҳтиёж ва қизиқишлари бўйича тинимсиз ишлаши кераклиги кўрсатиб ўтилди.
