Айниқса, ахборот шакллари шиддат билан янгиланаётган ҳозирги даврда босма матбуотнинг масъулияти ва воқеликка креатив ёндашув мезонлари ҳар қачонгидан ҳам муҳимроқ аҳамият касб этмоқда. Шу маънода, Қарши давлат университетида “Янги Ўзбекистон” ва “Правда Востока” газеталари кунлари доирасида ўтказилган учрашув ҳамда “Янги Ўзбекистон орзуси” китобининг тақдимоти “расмий тадбир” ҳалқасидан чиқиб, зиёлилар, педагоглар ва талаба-ёшларни бир жойга жамлаган платформага айланди. Мамлакатимиздаги янгиланиш жараёнларини англаш, унинг моҳиятини етказиш масъулиятини яна бир бор кун тартибига қўйди.
Тадбирда “Янги Ўзбекистон” ва “Правда Востока” газеталари таҳририяти бош муҳаррири Салим Дониёров, бош муҳаррир ўринбосари Абу Бакир Ўрозов, Ўзбекистон Республикаси Олий Мажлиси Сенати аъзоси, профессор Абдураҳим Эркаев, Қашқадарё вилояти ҳокими ўринбосари Фарҳод Кушаков, Олий Мажлиснинг Инсон ҳуқуқлари бўйича вакили (омбутсман)нинг Қашқадарё вилоятидаги минтақавий вакили Лола Саодатова, Қарши техника университети проректори, филология фанлари доктори Аброр Муртазоев, ижодкорлар ҳамда институт профессор-ўқитувчилари, талаба-ёшлар ва оммавий ахборот воситалари вакиллари иштирок этди.
Сўзга чиққанлар миллий медиа маконимизда “Янги Ўзбекистон” ва “Правда Востока” газеталарининг ўрни ва аҳамияти ҳақида сўз юритди. Айниқса, таҳририятнинг замонавий талабларни тўла ўрганиб, ўзлаштириб фаолият юритиши эътироф этилди. Жумладан, газеталардаги мақолаларни таҳририятнинг расмий веб-сайти, ижтимоий тармоқлардаги саҳифалари орқали ҳам ўқиш имконияти бор. Бу ёшлар орасида ҳам бугунги сиёсий-ижтимоий воқеалар ҳақидаги таҳлилий мақолалар билан танишиб бориш имконини беради.
— Матбаа нашрлар бир неча ўн йиллар давомида тарихан ўз зиммасига юклатилган муҳим вазифани ижтимоий-сиёсий, иқтисодий, маданий-маърифий ва илмий ҳаётга оид долзарб ахборотни ҳозиржавоблик билан турли публицистик шаклларда оммага етказиб, шу йўл билан муштарийларда ҳаёт воқеликларига нисбатан муайян муносабат ва тасаввур пайдо бўлишига, сиёсий, иқтисодий, ахлоқий ғоя ва эътиқодлар шаклланишига таъсир кўрсата бориб, жамоатчилик фикрининг маҳсули ва ифодачиси бўлиб келди, — дейди Аброр Муртазоев. — Нафақат ахборот воситаси, балки муайян даврнинг воқеа-ҳодисалари, янгиликларини, ривожланиш силсиласини ўз саҳифаларида муҳрлайдиган энг муҳим тарихий манба вазифасини ҳам ўтади. “Янги Ўзбекистон” газетаси олдида мамлакатдаги сиёсий, иқтисодий ва ижтимоий ислоҳотларни кенг ёритиш, давлат сиёсати ва унинг натижаларини аҳолига тушунарли тарзда етказиш, жамиятдаги муҳим масалаларни кўтариш ва муҳокама майдонини яратиш каби қатор мақсадлар бор. Нашр нафақат расмий ахборот тарқатиш, балки таҳлилий журналистикани ривожлантиришни ҳам ўзига вазифа қилиб қўйган.
Тадбир доирасида “Янги Ўзбекистон орзуси” китоби тақдимоти иштирокчиларда алоҳида қизиқиш уйғотди. Ўзбекистон Республикасида хизмат кўрсатган журналист Салим Дониёров муаллифлигидаги ушбу асар мамлакатимиз кечираётган шарафли трансформация йўлини, халқнинг орзу-интилишлари амалий натижаларга қандай кўчаётганини публицистик таҳлиллар асосида очиб беради. Маърузачилар китобда илгари сурилган хулосалар ёш авлодда фуқаролик позициясини мустаҳкамлаш ва мамлакатдаги жараёнларга дахлдорлик ҳиссини кучайтиришда муҳим манба бўлишини таъкидлади.
— Тадбир доирасида тақдим қилинган “Янги Ўзбекистон орзуси” китоби айни давр ўзгаришларини, давлат сиёсатининг моҳиятини оммага яқинлаштириш мақсадида ёзилган. Унда юртга муҳаббат, миллий ҳамда умуминсоний қадриятларга ҳурмат туйғулари ўз ифодасини топган, — дейди Абдураҳим Эркаев. — Газета мақсади ҳам шундай. Умуман, газетадаги материаллар замонавий журналистиканинг барча жанр ва йўналишларида, илғор технологияларни фаол қўллаган ҳолда ёритилаётгани унинг жозибадорлиги, ўқимишлилигини янада оширмоқда. “Янги Ўзбекистон” газетасидаги ички ва ташқи сиёсат, иқтисодиёт, саноат, қишлоқ хўжалиги, рақамли технологиялар, таълим, фан ва инновациялар, санъат ва маданият, адабиёт, халқаро ҳаётга доир ранг-баранг материаллар мавзу, мазмун, география, ёндашув жиҳатдан бетакрор. Бу эса мазкур нашр таркибида катта тажрибага эга бўлган, аҳил, ҳамфикр, ўзаро бирдам, якдил ижодий жамоа шаклланганидан дарак беради.
Самимий ва қизғин руҳда кечган учрашув давомида ёшлар ўртасида викторина ўтказилди. Фаол иштирок этиб, саволларга тўғри жавоб берганлар эсдалик совғалари билан тақдирланди.
