Ҳукуматга олти ой ичида тегишли қонунчилик чораларини кўриш вазифаси юклатилди. Давлат раҳбари бу ҳақда халққа мурожаатида маълум қилди, деб хабар берди 24.kg.
Садир Жапаровнинг сўзларига кўра, ушбу қарор энергетик ичимликларни истеъмол қилишнинг саломатликка етказиши мумкин бўлган зарарлари борасидаги хавотирлар билан боғлиқ. Унинг таъкидлашича, ушбу масала ҳам фуқаролар, ҳам Жогорку Кенеш (парламент) аъзолари томонидан кўтарилган.
Президент мамлакатда энергетик ичимликлар истеъмоли бўйича маълумотларни келтириб ўтди. 2025 йилда Қирғизистон аҳолиси 54 199 000 литр энергетик ичимлик истеъмол қилган, бу тахминан 129 миллион банкага тенг.
2026 йилнинг биринчи ярмида эса истеъмол ҳажми 36 083 000 литрни ёки тахминан 85,9 миллион банкани ташкил этди.
Ўтган йили Қирғизистон Республикаси ҳудудида 25 263 000 литр шундай ичимликлар ишлаб чиқарилган. Яна 28 430 000 литр маҳсулот Евроосиё иқтисодий иттифоқи (ЕОИИ)га аъзо давлатлардан, 1 239 000 литри эса бошқа мамлакатлардан импорт қилинган.
Садир Жапаров, шунингдек, бундай тақиқнинг иқтисодий оқибатлари масаласига ҳам тўхталди.
Дастлабки ҳисоб-китобларга кўра, давлат буджети тўғридан-тўғри ва билвосита солиқлардан тушадиган даромадлар ҳисобига тахминан 1,5 миллиард сом йўқотиши мумкин.
2025 йилда ушбу соҳадан тушган солиқ ва божхона тушумлари жами 1 104 100 000 сомни, 2026 йилнинг дастлабки олти ойида эса 996 710 000 сомни ташкил этган.
“Миллат, фуқаролар ва келажак авлодларнинг саломатлигини пул билан ўлчаб бўлмайди”, — деди давлат раҳбари. У соғлиқ билан боғлиқ муаммоларнинг оқибатларини бартараф этишдан кўра, уларнинг олдини олиш муҳимроқ эканини таъкидлади ҳамда одамларни энергетик ичимликларни меъёрдан ортиқ истеъмол қилиш хавфлари борасида тиббиёт ходимларининг огоҳлантиришларига қулоқ солишга чақирди.
