Анжуманда Германия, Туркия, Грузия ва Озарбайжон рақобат органлари вакиллари, БМТнинг Савдо ва тараққиёт бўйича конференцияси (UNCTAD), Халқаро валюта жамғармаси, Иқтисодиёт ва молия вазирлиги, Стратегик ислоҳотлар агентлиги, шунингдек, қатор халқаро ва миллий ташкилотлар раҳбарлари, экспертлар ва олимлар иштирок этди.
Тадбирдан кўзланган асосий мақсад глобал иқтисодий ноаниқлик, инфляция босими, таъминот занжирларидаги узилишлар ва рақамли трансформация шароитида рақобат сиёсатини такомиллаштириш, адолатли рақобат муҳитини кенгайтириш, истеъмолчилар ҳуқуқларини ҳимоя қилиш ҳамда барқарор иқтисодий ўсишни таъминлаш бўйича халқаро тажриба ва амалий ёндашувларни муҳокама қилишдан иборат бўлди.
— Бугун рақобат сиёсати иқтисодиёт барқарорлиги ва бозорлар самарадорлигини таъминлашнинг муҳим омилига айланмоқда. Адолатли рақобат тадбиркорликни қўллаб-қувватлайди, инновацияларни рағбатлантиради ва энг муҳими, истеъмолчилар манфаатларини ишончли ҳимоя қилади. Бу борада халқаро ҳамкорлик ва илғор тажрибаларни ўрганиш мамлакатимизда амалга оширилаётган ислоҳотлар самарадорлигини янада оширишга хизмат қилади деди, – Рақобат қўмитаси раиси Ҳалилуллоҳ Турахужаев.
Конференция давомида хорижий ва маҳаллий экспертлар томонидан рақобат сиёсатининг замонавий ёндашувлари, бозорларда рақобат муҳитини кучайтириш, монополияларни чеклаш, инновациялар ва меҳнат унумдорлигини ошириш ҳамда истеъмолчилар фаровонлигини таъминлаш масалалари юзасидан маърузалар тақдим этилди.
Тадбир якунида иштирокчилар халқаро тажриба алмашинувини кенгайтириш, рақобат сиёсатини янада такомиллаштириш ва барқарор ҳамда инклюзив иқтисодий ўсишга хизмат қиладиган амалий ҳамкорликни ривожлантириш муҳим эканини таъкидладилар.
Зулхумор Акбарова
