2026 йил 10 август куни тонгда Россия Федерацияси Татаристон Республикасининг Нижнекамск шаҳридаги бир қатор объектларга дронлар орқали ҳужум содир бўлди. Дастлабки маълумотларга кўра, ҳодиса оқибатида Нижнекамск шаҳрида фаолият юритган қурилиш корхонасида қурувчи бўлиб ишлаган 8 нафар Ўзбекистон фуқароси ҳалок бўлган.
Шунингдек, бир нечта юртдошимиз турли даражадаги тан жароҳатлари билан шифохонага ётқизилган.
Ўзбекистон Республикаси Президенти Шавкат Мирзиёевнинг топшириғига мувофиқ, Ўзбекистон Республикаси Бош вазирининг ўринбосари О. Раматов бошчилигида масъул вазирлик ва идоралар вакилларидан иборат Ҳукумат комиссиясини ташкил этиш бўйича Вазирлар Маҳкамасининг фармойиши қабул қилинди.
Ҳукумат комиссиясига ҳодиса оқибатида жабрланган фуқароларимизнинг ҳолидан хабар олиш, уларга зарур ёрдам кўрсатиш, ҳалок бўлган Ўзбекистон фуқароларини махсус рейс орқали Ўзбекистонга олиб келиш ва тегишли манзилларга етказиш, шунингдек, уларнинг оила аъзоларига ҳар томонлама кўмаклашиш вазифалари юклатилган.
Шунингдек, Фавқулодда вазиятлар вазирлиги, Ташқи ишлар вазирлиги, Соғлиқни сақлаш вазирлиги, Миграция агентлиги ва бошқа мутасадди ташкилотлар вакилларидан иборат махсус ишчи гуруҳ Россияга юборилган.
Айни пайтда Ўзбекистоннинг Қозон шаҳридаги Бош консулхонаси ва Миграция агентлиги вакиллари ҳодиса жойига етиб борган. Улар Россия томонининг масъул идоралари билан доимий алоқада бўлиб, зарур чора-тадбирларни амалга оширмоқда.
Жабрланган Ўзбекистон фуқаролари ҳақида тезкор маълумот олиш учун қуйидаги телефон рақамларига мурожаат қилиш мумкин:
Ўзбекистон Республикасининг Қозон шаҳридаги Бош консулхонаси: +7 965 600 79 79
Миграция агентлигининг Россиядаги ваколхонаси: +7 925 750 87 57, +7 925 127 00 02
