«НКМК» АЖ Матбуот хизматининг маълум қилишича, жорий йилнинг 10 сентябрь куни соат 15:00 ларда «Қизилқум» кон бошқармаси Автомобиль транспорти бошқармаси «Пистали» 1-транспорт цехининг фойдаланишда бўлган автомобиль шиналарини сақлаш майдонида бахтсиз ҳодиса содир бўлган.
Ҳодиса қувур ташувчи автомашина тиркамасида шинамонтаж ишларини бажариш вақтида юз берган. Оқибатда 2 нафар ишчи-ходим вафот этган.
Мазкур ҳолат юзасидан ҳуқуқни муҳофаза қилувчи органлар томонидан терговга қадар текширув ишлари олиб борилмоқда. Шунингдек, назорат қилувчи давлат ташкилотлари томонидан махсус текширув ўтказилиб, бахтсиз ҳодисанинг содир бўлиш ҳолатлари ва келиб чиқиш сабаблари ўрганилмоқда.
Комбинатнинг масъул хизматлари томонидан бундай бахтсиз ҳодисаларнинг олдини олиш бўйича зарур чора-тадбирлар кўрилмоқда.
«НКМК» АЖ Матбуот хизмати ҳалок бўлганларнинг оила аъзолари ва яқинларига чуқур ҳамдардлик билдирди.
