Бунинг учун тинимсиз меҳнат, кучли сиёсий ирода, бугунги кунни тўғри баҳолаб, келажакни кўра билиш лозим. Муҳими, халқнинг қалбини англаб, уни ортидан эргаштира оладиган етакчи бўлиши зарур.
Маҳаллани ривожлантириш ва жамиятни юксалтириш йилида бажарилаётган ишлар, умуман, янги Ўзбекистондаги ислоҳотлар ўзида мана шу уч устунни жамлаган. Шу ўринда жорий йил номининг мазмун-моҳиятини қисқача изоҳласак. Халқимиз азалдан барча масалаларга маҳалланинг ўзидан ечим топган. Оқсоқоллар ижтимоий-иқтисодий масалаларни ҳал қилган. Бунда жамиятдаги бирдамлик, бир-бирини қўллаб-қувватлаш иш берган. Масалан, оқсоқолнинг сўзи боис, бойлар иқтисодий аҳволи оғир оилага кўмак берган. Ҳунармандлар йўқсил оилалар фарзандларига тамасиз касб ўргатган. Кўчалар ободлиги, асосан, ҳашар йўли билан бажарилган. Шу боис, “Аҳиллик бор жойда барака бор” деган мазмундаги нақл пайдо бўлган. Яъни ижтимоий бирдамлик орқали иқтисодий барқарорликка эришилган. Иқтисодий ўсиш ўз-ўзидан таълимга, инсон капиталини юксалтиришга хизмат қилади. Шу сабабли маҳаллаларда оқсоқолларнинг обрўси баланд бўлган. Эҳтимол, улар зарбоф чопон киймагандир, аммо масалани жойида ҳал эта олган. Ҳар қандай даврда ҳам мана шундай оқсоқолларга — халқ ичидан чиққан фидойи инсонларга эҳтиёж сезилади. Негаки, айнан улар мамлакатдаги ислоҳотларни жойларда бирдек олға силжишига кўмак беради. Бу хусусда яна тўхталамиз. Демоқчимизки, ҳаёт, тараққиёт бир жойда тўхтаб турмайди. Янгиланишлар жараёни доим замонавий қиёфада намоён бўлади. Ана шу замонавийлик асл илдизлардан қувват олса, ҳаётбахшлик касб этади.
Янги Ўзбекистондаги ислоҳотлар ҳам айнан шу илдизлардан андоза олиб, замонавий қувват, янгича руҳиятда кечяпти. Буни Президентимизнинг “Маҳаллани ривожлантириш ва жамиятни юксалтириш” йилида устувор йўналишлар бўйича ислоҳотлар дастурлари ва “Ўзбекистон — 2030” стратегиясини амалга ошириш бўйича давлат дастури тўғрисида”ги фармони, унинг мазмун-моҳияти таҳлилида ҳам кўриш мумкин.
Шу ўринда маҳаллаларга янги Ўзбекистон нафасини олиб кириш учун белгилаб берилган айрим жиҳатларни санаб ўтсак. Жумладан, маҳаллаларда 100 мингта янги иш ўрнини яратиш учун 10 мингдан зиёд ишлаб чиқариш ва хизмат кўрсатиш лойиҳаси ишга туширилади.
Камбағаллик ва ишсизликдан холи маҳаллалар сонини 3,5 мингтага етказиш назарда тутилган. Муҳими, маҳаллалардаги муаммоларни бир вақтнинг ўзида тезкор ҳал этишда барча давлат органларига масъулиятни юклаб, ижрони 24/7 режимда онлайн назорат қилиш амалиётини йўлга қўйиш кўрсатилган. Қолаверса, маҳаллалар инфратузилмасини такомиллаштиришга 20 триллион сўм ажратилиб, уларга янги Ўзбекистон қиёфаси олиб кирилмоқда.
Мамлакатимиз етакчиси белгилаб берган мана шу тўртта вазифа юқорида қайд этганимиз тараққиёт формуласига мос тушади. Масалан, инсон капиталини юксалтириш ҳақида тўхталсак. Таъкидланганидек, маҳаллаларда янги иш ўринлари яратишга жиддий эътибор берилмоқда. Бунинг учун тадбиркорларга кенг йўл очилиб, маҳаллада ишлаб чиқариш қувватлари кенгайтириляпти. Шу орқали аҳоли ишли бўляпти. Ўша иш ўрнига муносиб бўлиши учун аҳоли, хусусан, ёшлар ва хотин-қизлар касбга бепул ўқитиляпти. Негаки, улар жамиятнинг заиф қатлами. Ана шу қатлам мустаҳкам бўлса, мамлакатдаги ижтимоий муҳитда барқарорлик устувор бўлади.
Биргина мисол, Навоий вилоятининг Нурота туманидаги Амир Темур маҳалласида яшайдиган Нигина Каримовага “маҳалла еттилиги” ёрдам бергач, уйида асаларичилик ва новвойликни йўлга қўйган. У имкониятдан куч олиб изланди, ишлади. Натижада маҳаллада тажрибали тадбиркор деган ном қозонди. Бугун Нигина Каримова тадбиркор бўлиш истагидаги маҳалладошларига ёрдам беряпти. Бу бир қарашда жуда оддий мисол. Аммо уни таҳлил этсангиз, жуда катта ҳаётий ҳақиқатлар ўртага чиқади. Нигина Каримова рўзғорини юритишга қуввати йўқ, қийналган юртдошларимиздан бири эди. “Маҳалла еттилиги” унинг иш бошлаши учун шароит яратиб берди. Уйига бориб вазиятни ўрганди, тадбиркорлик қилмоқчи бўлса, ёнида туришини айтиб, унга ишонч кўрсатди. Натижа эса кутилганидай бўлди. Таъкидланганидек, энди бошқаларга шу йўлда кўмакчи бўляпти. Бир фуқарога кўрсатилган тўғри йўл, берилган ёрдам ислоҳотларнинг занжирли равишда изчил давом этишига сабаб бўлмоқда.
Қорақалпоғистоннинг Нукус туманидаги “Biogumus” фермер хўжалигида помидорни табиий шароитда қуритиб, экспорт қилиш йўлга қўйилган. Ушбу корхонада ишлаётганлар ёшлар ва хотин-қизлар. Улар аввал касб ўрганиб, кейин ишли бўлмоқда. Шу орқали малакали кадрлар сафи кенгайиб, иқтисодий барқарорлик таъминланяпти.
Қорақалпоғистонлик тадбиркорларга алоҳида эътибор берилиб, имтиёзлар тақдим этилгач, катта ютуқлар кўрина бошлади. Улар аҳоли бандлигини таъминлашга хизмат қиляпти. Бунинг замирида ҳам аслида маҳаллага берилган эътибор, яратилган кенг имкониятлар бор.
Шу ўринда яқин тарихимиз ёдга тушади. Маҳалла тизимидаги тарихий илдиз муайян муддат аслиятидан узилиб қолган эди. Собиқ шўро тузумида маҳалла марказга хизмат қиладиган, мафкурасини тарғиб этадиган идорага айланганди. Маҳалла аҳолига кўмакчи эмас, уларни назорат қиладиган тузилма эди. Ўзини ўзи бошқариш хусусияти буткул чекланганди. Ҳозир бу ҳақида кўп таъриф келтириб вақтни олмоқчи эмасмиз. Мустақиллик сабаб маҳалла тизими ўша қолипдан чиқарилди. Ўзини ўзи бошқариш вазифаси қайтарилди. Лекин имконияти чекланганича қолиб кетди. Яқин йилларда ҳам маҳалла фаоллари раис билан бирга имтиёзли нархда киши бошига граммлаб ўлчаб бериладиган ёғ ва ун тарқатарди. Бугун ёшлар бунга ишонмайди, лекин биз маҳалла идораси ёнига бориб, арзонроқ нархда ўн беш кило ун оламиз деб, ярим кунлаб навбатда турганмиз.
Бу борада ижтимоий адолат ҳақида айтиш зарур. Ўша арзонлаштирилган ун ва ёғни маҳсулот тарқатилаётган куни чўнтагида пули бор одамгина оларди. Камбағалларга, ижтимоий кўмакка муҳтожларга алоҳида эътибор деган қараш йўқ эди. Оқибат бу имтиёздан ҳам кўп ҳолларда бойлар фойдаланарди. Ҳа, расмий равишда камбағал йўқ эди. Лекин имтиёзли нархдаги ун ва ёғни сотиб олишга ҳам қурби етмайдиган инсонлар билан ёнма-ён яшардик...
Янги Ўзбекистондаги ислоҳотларнинг илк кунлариданоқ маҳаллаларга хотин-қизлар ва ёшлар масаласини ўрганиш учун ходимлар бириктирилди. Бу саф аста-секин кенгайиб, мутлақо янги ва замонавий тузилма — “маҳалла еттилиги” вужудга келди. Улар уйма-уй юриб, аҳолининг асл вазиятини ўрганиб, масалаларга жойида ечим топмоқда. Кимдир тадбиркорлик қилмоқчими, марҳамат, кредит олиб берилади. Заруратга қараб ускуна ва дастгоҳлар бепул тақдим этилади. Токи иши юришиб кетгунча ҳар жиҳатдан кўмаклашади. Томорқада маҳсулот етиштирмоқчи бўлса, уруғидан тортиб, маҳсулотни сотишгача бўлган жараённи қамраб олган тизим ишлайди. Шу боис, маҳалла драйвери белгилаб олинмоқда. Ижтимоий ёрдамга муҳтож шахсларга тиббий, ҳуқуқий, иқтисодий, психологик ёрдамлар бепул берилади. “Еттилик” қадимдаги оқсоқоллар бажарган ишни қўлга олган. Масалани маҳалладан чиқмай, жойида ҳал этяпти. Бу қадимий илдизлардан куч олиб, янги, ҳаётбахш тизим яратиш дейилади!
Ҳа, “еттилик” тизими жорий этилгач, кредит, субсидия, компенсация, моддий ёрдам ажратиш каби 100 дан зиёд хизмат маҳалла даражасига туширилди. Натижада маҳалла аҳолига амалий ёрдам берадиган тизимга айланди. Манзилли ишлар кўлами кенгайгач, Халқ қабулхоналари ва ҳокимликларга ижтимоий хизмат ҳамда ёрдам масалалари бўйича мурожаатлар 35 фоиз камайган. Шунинг ўзиёқ янги тизим масалаларни жойида ҳал этаётганини кўрсатади. Жорий йилдаги ишлар сабаб мазкур 35 фоиз кўрсаткич янада ошиши табиий.
Таъкидлаганимиздек, Президентимиз фармони билан маҳаллаларда 100 мингта янги иш ўрни яратиш белгиланган. Навоийлик Нигина Каримова ва помидорни қайта ишлаб, хорижга сотаётган нукуслик ёш тадбиркор Шерзод Ниязимбетов каби юртдошларимиз ана шу рақамлар ортиғи билан бажарилишига ҳисса қўшмоқда. Улар каби қаҳрамонларни юртимизнинг исталган ҳудудида топиш мумкин. Чунки бугун ҳар бир маҳалланинг ўз тадбиркорлари бор!
Кечаги кунимиздан бир лавҳа келтирсак. Илгари маҳаллада тадбиркорлар жуда кам эди. Айниқса, олис қишлоқларда тадбиркорлик масаласи оғриқли нуқта эди. Ёдимда, қишлоғимизда саноқли икки-учта дўкон бўларди. Ҳар ой солиқ текширувлари сабаб ўша дўконлар ҳам ҳафта-ўн кунлаб очилмасди. Ноқонуний савдо учун дўконга муҳр уриларди. Қонуний ишлаш учун эса тўсиқлар кўп, олинадиган солиқ миқдори баланд эди. Бу эса дўкондаги нархларга таъсир қилар, айни жиҳат савдо камайишига олиб келарди. Бугун ўша маҳаллада ўнга яқин дўкон бор. Бундан ташқари, хизмат кўрсатиш нуқталари очилган. Чекка қишлоқ дейилган манзилда каттагина ошхона, новвойхона ишлаяпти. Бунинг барчаси иш ўрни, даромад дегани. Ана шу ишлар натижасида камбағаллик ва ишсизликдан холи маҳаллалар сони янада ошиб боряпти. Самара аллақачон кўрина бошлади. Буни Қашқадарё вилояти Қамаши туманидаги Чим маҳалласи мисолида ҳам кўриш мумкин.
Ушбу ҳудудга “Янги Ўзбекистон қиёфасидаги маҳалла” мақоми берилди. Мазкур дастур асосида Чимнинг инфратузилмаси тубдан янгиланди. Масалан, ҳудудда 240 ўринли болалар боғчаси, маҳалла ва ёшлар марказлари, истироҳат боғи барпо этилган. Мана шунинг ўзиёқ иқтисодий-ижтимоий ҳаётимизда жуда катта аҳамиятга эга. Болалар боғчасини олайлик. Оналарнинг бола тарбиясидан вақт ажратиб, бошқа юмуш билан машғул бўлиши қийин. Боғчалар кўпайиши оиланинг ижтимоий муҳитига жуда катта ижобий таъсир кўрсатади. Аввало, бола ўз вақтида билим ва кўникмаларга эга бўлиб камол топади. Қолаверса, аёллар бемалол ишлаши мумкин бўлади.
Бир пайтлар олис Чим маҳалласида аҳоли бориб ҳордиқ чиқарадиган бирор манзил йўқ эди. Истироҳат боғи шу масалага ечим бўлди.
Кейинги йилларда қишлоқларда ҳам соғлом турмуш тарзига амал қилиш учун кечки сайрга чиқиш, пиёда юриш одатий ҳолга айланиб боряпти. Бундай сайрлар оилавий суҳбатларга, гурунглар эса бир-бирини тушунишга сабаб бўлади. Бунинг учун кўплаб маҳаллаларда пиёдалар учун хавфсиз йўлаклар қуриляпти. Улар қуёшдан қувват олиб ишлайдиган чироқлар билан ёритилмоқда. Йўллар асфальт қилиниб, хизмат кўрсатиш нуқталари яратиляпти. Булар ҳам қўшимча иш ўрни, халқимиз учун қулайлик дегани.
Аҳоли бандлигини таъминлаш борасида драйвер соҳалар белгилаб олинаётир. Чим маҳалласи мисолида ҳам буни кўришимиз мумкин. Ҳудуднинг тарихий илдизлари, аҳолининг йиллар давомидаги кўникмаларидан келиб чиқиб, янги лойиҳалар амалга оширилмоқда. Масалан, Чимда гиламчилик ва каштачилик корхонаси очилган. Банклар кўмагида 20 га яқин хонадонда умумий майдони 36 сотихли иссиқхоналар, етиштирилган маҳсулотни сақлаш учун эса 200 тонналик музлаткич қурилган. Натижада 80 дан ортиқ ишсиз фуқаронинг бандлиги таъминланган. Маҳаллада кооперация асосида лимончилик йўлга қўйилган. Бунинг учун аҳолига кўчат, ўғит ва агротехник хизматлар етказиб берилади. Тайёр ҳосил эса кафолатланган нархда сотиб олинади. Ҳа, ҳатто хорижлик харидорлар Чим каби олис манзилларда етиштирилган маҳсулотни тўғридан тўғри сотиб оляпти.
Умуман, бундай мисолларни кўплаб келтириш мумкин. Демоқчимизки, бу ишлар маҳалла тизимидаги янгиланишлар сабаб ўз вақтида самарали амалга ошириляпти. Яъни маҳаллаларга банкирлар ва солиқ органлари ходимлари бириктирилди. Бир пайтлар солиқчининг машинаси кўринса, дўконини ёпиб қочган ишбилармонлар бугун уларнинг тавсияси, кўмаги билан иш қиляпти. Баъзан ўша солиқчилар маҳалладаги имкониятларни ўрганиш учун тадбиркорлардан маслаҳат оляпти. Буни бир сўз билан ижтимоий бирдамлик дейишади!
“Маҳалла банкирлари” эса аҳолининг даромад манбаларини аниқлаб, тадбиркорлик лойиҳаларини ишлаб чиқяпти. Кредит ресурсларидан фойдаланишга кўмаклашяпти. Шу жараёнда инфратузилмани ривожлантириш учун эса алоҳида маблағ ажратилмоқда.
Маҳаллани ривожлантириш ва жамиятни юксалтириш йилида устувор йўналишлар бўйича ислоҳотлар дастурлари ва “Ўзбекистон — 2030” стратегиясини амалга ошириш бўйича давлат дастури ижроси доирасида маҳаллада аҳоли ташаббусларини қўллаб-қувватлашнинг янги механизмлари амалиётга татбиқ этилмоқда. Бугунги фуқароларнинг маҳаллий даражадаги қарорлар қабул қилиш жараёнидаги иштирокини кенгайтириш мақсадида “Маҳаллам — лойиҳам” дастури амалиётга жорий этилди. “Рақамли маҳалла” платформасида унинг махсус модули ва мобил иловаси ишга туширилди. Ушбу дастур доирасида “Янги Ўзбекистон қиёфасидаги туман (шаҳар)” мақоми бериладиган 33 туман (шаҳар)даги 1609 маҳаллада “маҳалла еттилиги” ва фаоллар иштирокидаги муҳокамалар натижасида 1390 та лойиҳа шакллантирилди. Ғолиблар эса бевосита аҳолининг овози асосида аниқланди. Натижада 33 та лойиҳа ғолиб топилган. Мана шу лойиҳаларда нималар назарда тутилганини ўрганиб, бугун халқимиз маҳалласида қандай ишларни бажариш ниятида яшаётганини билиш мумкин. Эътибор беринг, улар асосан спорт майдончалари, қуёш батареяли кўча ёритқичлари, болалар майдончалари, таълим муассасалари ва кутубхоналарни жиҳозлаш, пиёдалар йўлакчалари, минипарклар ва дарахтзорлар барпо этишга қаратилган лойиҳалар!
Бир пайтлар лой ва чанг аримайдиган кўчамизга тош-шағал тўкайлик дердик. Бугун кўплаб ички йўллар асфальтланди. Энди шу йўлларни ёритиш, мактаб ва боғчаларни кўпайтириш, кутубхоналар очиш ниятида яшаяпмиз. Айни ўринда яна тарихга бир назар солсак.
Ёдимда, маҳалламиз идорасининг эски биноси тадбиркорга сотиб юборилди. Бир муддат маҳалла раиси уйидан туриб ишлади. Сўнг қўшни маҳаллада ишламай қолган дўкон ўрнини эгаллади. Ёғоч деворли бино ҳам кўпга бормади. Тағин сарсонгарчилик бошланди. Шундай кунларнинг бирида маҳалланинг эски биноси ёнидан ер ажратилиб, гузар қурилди.
Ўша даврдаги яна бир оғриқли нуқта. Маҳалла бошқа идораларга маълумотнома берадиган тузилмага айланиб қолганди. Сира ёдимдан чиқмайди. Бир сафар олий таълимга ҳужжат топшириш учун олис воҳадан Тошкентга келдим. Ҳамма ҳужжат қўлимда. Фақат яшаш манзилим ҳақида маҳалладан маълумотнома олмаган эканман. Шу сабаб ҳужжатим қабул қилинмади. Ваҳоланки, паспортимда қайси маҳаллада яшашим ҳақида муҳр бор. Уни туман ички ишлари тасдиқлаган. Лекин унинг қиймати кўчада ёзиб олиш мумкин бир парча қоғозчалик эмас экан. Ана шу маълумотномани олиш учун маҳалла раисини излар, минг тавалло билан маълумотнома олардик. Очиқ гап, ҳар бир маълумотноманинг ўз баҳоси бор эди. Қоғоз пули!
Бундан ташқари, оғир вазиятдаги шахсларга бериладиган нафақа ва ёрдам пулларини ҳам маҳалла раиси ҳал этарди. Давлат хизматларининг катта қисми онлайн кўрсатиладиган бўлди. Маҳалладан маълумотнома олиш буткул бекор қилинди. Ижтимоий қўллаб-қувватлаш тизими тубдан янгиланди. Аввал ҳар бир хонадон ўрганилган бўлса, энди ҳар бир шахс алоҳида эътиборга олинмоқда. Ота ишлаб яхши даромад олиб келяптими, бўлди деган қараш эскирди. Энди мактабни тамомлаган ўғил нима қиляпти, боласи боғчага бормаётган келиннинг аҳволи қандай деган қарашлар устуворлик касб этмоқда. Мақсад эса битта — халқни рози қилиш!
Самарадорлик амалий натижа билан исботланмоқда. Бунинг учун аниқ режа мустаҳкамлаб олинган. Жумладан, “Ўзбекистон — 2030” стратегиясида маҳаллани ривожлантириш 74-мақсад сифатида мустақил устувор вазифа тарзида белгиланган. Унга кўра, маҳалла аҳоли фаровонлигини таъминлаш ва ҳудудлардаги кундалик масалаларни ҳал этишда жамоатчилик билан давлат органлари ўртасидаги “таянч кўприк”ка айлантирилади. Бу мақсад доирасида аҳоли ташаббуси асосида маҳаллалар инфратузилмасига ажратиладиган маблағ 2030 йилгача 16 триллион сўмдан 24 триллион сўмга чиқарилади. Шунингдек, маҳаллалардаги интерактив киосклар орқали кўрсатиладиган давлат хизматлари сони 50 мингтадан 1 миллионтага етказилади.
Яна бир муҳим жиҳат. Стратегияда маҳаллаларда 3940 та хотин-қизлар бандлиги ва саломатлик марказини ташкил этиш назарда тутилган. Улар рўзғор ташвиши ва бола тарбияси билан банд аёлларга уйидан узоқлашмай касб ўрганиш, ишга жойлашиш ва соғлиғига эътибор қаратиш имконини беради.
Қолаверса, камида 5 мингта спорт майдончаси барпо этиш, туризм маҳаллалари сонини 140 тага етказиш мақсад қилинган. Очиғи, Тошкентга келгунимча чиқинди махсус техника орқали олиб чиқиб кетилишини билмаганман. Бугун энг чекка қишлоқларда ҳам бу хизмат йўлга қўйиляпти. Стратегиядаги мақсадга кўра, маиший чиқиндиларни олиб чиқиш хизматлари билан маҳалла кесимида қамраб олишни 90 фоизга етказиш назарда тутилган. Бу мақсадлар амалга ошиши натижасида аҳоли кўплаб масалаларини узоққа бормасдан, ўз маҳалласида ҳал қила олади. Хусусан, болалар учун спорт майдончалари пайдо бўлади. Маълумотнома ёки бошқа давлат хизматини олиш учун туман марказига қатнаш шарт бўлмайди. Ҳар бир вазифа учун аниқ рақам ва масъул идора белгиланган. Шу боис, ишлар қандай кечаётгани аниқ кўриниб туради.
Муҳими, ана шу янгиланишлар аҳолининг ўзи билдирган таклиф ва эҳтиёжларга таяниб бажарилади. Мана шунинг ўзиёқ мақоламиз аввалида айтганимиз асл илдизларга таяниб, замонавий имкониятлар яратилаётганини кўрсатади. Мақсад эса эзгу: инсон қадрини улуғлаш орқали бир бутун халқ, ягона ватан бўлиб бирлашиш!
Қувонарлиси, ислоҳотлар чиройли рақамлар эмас, самарадорлик, амалий натижа билан баҳоланмоқда. Оддий мисол, камбағалликни қисқартириш борасидаги рақамларни олайлик. Илгари камбағаллик, ишсизлик деган сўзларни ҳатто тилга олиш ҳам мумкин эмасди. Бугун очиқ айтиляпти, камбағаллик даражаси 3 фоиздан паст бўлган маҳалла ва туманлар “камбағалликдан холи” ҳудудлар ҳисобланади. Шунинг ўзиёқ рақам эмас, аниқ натижа учун ислоҳотлар қилинаётганини кўрсатади.
Мақоламиз аввалида дунё цивилизацияларини бирлаштирган уч устун — инсон капитали, бирдамлик ва иқтисодий барқарорлик ҳақида гапирган эдик. Бугун маҳаллалардаги ўзгаришларни кузата туриб, шу уч устуннинг моҳиятини кўргандай бўламан. Назаримда, маҳаллалардаги инфратузилма яхшиланиши, аҳолининг касбга ўқитилиши, янги боғча ва мактаблар инсон капиталини юксалтиришга хизмат қилади. Яъни бу ишлар сабаб камбағаллик камаяди. Ишсизлар сафи қисқаради, халқимиз ўз олдига катта мақсадлар қўяди. Боламни ўқитсам, ўзим энг замонавий касбларни ўргансам дейди. Шу зайилда инсон капитали юксалади. Бу, ўз ўрнида, иқтисодий барқарорликка хизмат қилади. Тўкинлик эса жамиятдаги бирдамликни мустаҳкамлайди.
Маҳалла тизимида нуронийларга катта эътибор берилмоқда, “Бувижонлар мактаби” каби тажрибалар айрим бўшлиқларни тўлдирмоқда. Муҳими, халқни битта ғоя — ватанпарварлик руҳи атрофида бирлаштира олишдир. Шундагина тараққиёт формуласи деганимиз том маънода ўзини оқлайди. Шу боис, бугун маҳаллаларда халқимиз кўнглидаги орзу-умидлар рўёбга чиқмоқда. Зеро, 2026 йил номида маҳаллани ривожлантириш ва жамиятни юксалтириш мақсадлари жамланишида ҳам ана шундай катта ҳаётий ҳақиқатлар бор!
Боборавшан ҒОЗИДДИНОВ,
“Янги Ўзбекистон” мухбири
