Ҳаво ифлосланиши кучайишини оддий мисол билан тушунтириш мумкин: чанг ва зарарли моддалар ҳавога доимий равишда чиқарилади. Шамол бўлмаса, уларнинг тарқалиб кетиши қийинлашади. Ёмғир эса ҳаводаги чанг заррачаларини ювиб туширади.
Шамол ва ёмғир бўлмаган даврда ифлослантирувчи моддалар ҳавода тўпланиб боради. Атмосфера инверсияси эса уларнинг юқорига кўтарилиб, тарқалишини янада қийинлаштиради.
Кузатишларга кўра, куннинг иссиқ вақтида шамол эсиб, чанг тарқалиши ҳисобига ҳаводаги ифлосланиш даражаси нисбатан пасайиши мумкин. Тонгда ва кечқурун эса инверсия таъсирида чанг тарқалмай, ифлосланиш даражаси ортиши кузатилади.
Атмосфера ҳавоси сифатини яхшилаш мақсадида шаҳар йўлларига сув сепиш, иссиқхоналарда фильтрлар ўрнатиш, кўкаламзорлаштириш ва қурилиш майдонларида чанг кўтарилишининг олдини олиш каби ишлар амалга оширилмоқда.
Шунингдек, атроф-муҳитни ифлослантираётган иссиқхоналар ва саноат корхоналарида рейдлар ўтказилмоқда.
