Бу ҳақда Kazinform агентлиги хабар берди.
Янги кодекс табиатни муҳофаза қилиш ва табиий ресурслардан фойдаланишга оид нормаларни ягона ҳужжатга жамлади. Унда «ифлослантирувчи тўлайди» тамойили мустаҳкамланиб, чиқиндиларни бошқариш, рақамли экологик мониторинг, иқлим ўзгаришига мослашиш ҳамда фуқароларнинг экологик ахборотдан фойдаланиш имкониятларига оид янги талаблар белгиланди.
Кодексга кўра, атроф-муҳитни тегишли рухсатномаларсиз ифлослантирган корхоналар энди беш баравар кўпроқ тўлов амалга ошириши керак. Бундай чиқиндилар ва ифлослантирувчи моддаларни жойлаштириш меъёрдан ортиқ деб ҳисобланади. Бироқ тўловни амалга ошириш қоидабузарни жавобгарликдан озод қилмайди. У табиатга етказилган зарарни қоплаши ва унинг оқибатларини бартараф этиши шарт.
Ҳужжат чиқиндиларни бошқариш қоидаларини ҳам қатъийлаштиради. Энди полигонларда пластик, ПЭТ-қадоқлар, батареялар, симобли лампалар, шиша, металл чиқиндилари, эски шиналар, фойдаланишдан чиққан автомобиллар ва қурилиш чиқиндиларини кўмиш тақиқланади.
Тиббий, биологик ва электрон чиқиндилар билан муомала қилиш бўйича алоҳида қоидалар жорий этилади. Маҳаллий ҳокимият органлари қоғоз, тўқимачилик, озиқ-овқат чиқиндилари ва металл каби қайта ишланадиган материалларни алоҳида йиғиш тизимини йўлга қўйиши лозим.
Кодексда «рақамли экология» тушунчаси ҳам киритилган. Унга мувофиқ, ягона давлат экологик мониторинг тизими ва ахборот ресурслари яратилади. Атроф-муҳит ҳолати тўғрисидаги миллий ҳисобот эса ҳар йили очиқ эълон қилиб борилади.
