Бу масала Теҳронда Тожикистон транспорт вазири Азим Иброҳим ва Эрон йўллар ва шаҳарсозлик вазири Фарзона Содиқ ўртасидаги учрашувда муҳокама қилинди.
Сўралган ёқилғи таркибига 2 миллион тонна хом нефть, 150 минг тонна бензин, 300 минг тонна дизель ёқилғиси ва 100 минг тонна авиация ёқилғиси киради. Умумий ҳажм 51 минг вагонни ташкил этади.
Томонлар нефть ва нефть маҳсулотларини Эрондан Тожикистонга етказиб бериш учун мавжуд транспорт ва логистика имкониятларини муҳокама қилди.
Тожикистон томони ёқилғи ташиш учун махсус цистернали поездларни ташкил этиш, Эрон темир йўлларида Тожикистон учун ёқилғи вагонларига махсус режим ва «яшил йўлак» жорий этишни сўраган.
Шунингдек, «Чобаҳор» портида «Тожикистон» логистика марказини ташкил этиш, Тожикистон транспорт воситаларининг Эрон ҳудудида ҳаракати билан боғлиқ айрим муаммоларни бартараф этиш ҳамда Эрон аэропортларида «Somon Air» учун айрим имтиёзлар бериш масалалари кўтарилган.
Учрашувда «Эрон — Афғонистон — Тожикистон — Хитой» янги логистика коридорини ташкил этиш масаласи ҳам муҳокама қилинди. Ушбу коридор доирасида темир йўл қуриш лойиҳаси ҳам кўзда тутилган.
Тожикистон транспорт вазирига кўра, янги темир йўл коридори юк ташиш масофасини 2 минг километргача, етказиб бериш вақтини эса 10 кунгача қисқартириши мумкин.
Маълумотларга кўра, 2026 йилнинг биринчи ярмида Тожикистон ва Эрон ўртасида 432,79 минг тонна юк ташилган. Бу ўтган йилнинг шу даврига нисбатан 117,5 фоизни ташкил этган.
