Ташриф давомида «Янги Ўзбекистон» массивини ривожлантириш ишлари кўздан кечирилиб, шунингдек, таъмирга муҳтож ижтимоий объектлар ҳолати ўрганилди. Жумладан, мусиқа мактаби каби янгиланиши лозим бўлган муассасалар билан бир қаторда, Геологлар маҳалласида жойлашган болалар боғчаси ҳам кўрикдан ўтказилди.
Қайд этилишича, мазкур боғча фақат капитал таъмирланиб қолмай, балки тубдан қайта қурилиши режалаштирилган. Реконструкция ишлари якунланганидан сўнг у Самарқанддаги энг йирик мактабгача таълим муассасаларидан бирига айланиб, 600 нафаргача болани қабул қилиш имконига эга бўлади.
Шунингдек, ташриф якунида вилоят ва туманлар раҳбарияти билан учрашув ўтказилиб, ҳудудларни ижтимоий-иқтисодий ривожлантириш масалалари муҳокама қилинди.
Таъкидланишича, амалга оширилаётган ва режалаштирилган барча ўзгаришлар мамлакатда олиб борилаётган кенг қамровли ислоҳотларнинг муҳим қисми ҳисобланади. Шу билан бирга, жойларда давлат раҳбари топшириқлари ижросини таъминлаш, мавжуд ҳолатни бевосита ўрганиш мақсадида бундай ташрифлар мунтазам амалга оширилиши қайд этилди.
