Республика ишчи гуруҳи 7–11 сентябрь кунлари институтнинг таълим, бошқарув, илмий-тадқиқот ва моддий-техник имкониятларини кенг қамровли ўрганмоқда.
Аккредитация жараёнида 3 нафар хорижлик экспертдан иборат 18 кишилик ишчи гуруҳ институт фаолияти билан танишмоқда.
Жараённинг дастлабки кунида институт ректори Шавкат Ҳасанов муассасанинг стратегияси ва эришган ютуқлари ҳақида тақдимот ўтказди. Шундан сўнг экспертлар ахборот-ресурс маркази, лабораториялар, хорижий ҳамкорлик ва стартап лойиҳалари, талабалар турар жойи, бошқарув, молия ҳамда ички таълим сифатини таъминлаш тизимини ўрганди.
Тошкент давлат аграр университети доценти, техника фанлари доктори Дилмурод Ҳакимовнинг таъкидлашича, комплекс аккредитация таълим муассасасининг талабаларга сифатли таълим бериш ва уларни кейинги ҳаётга тайёрлаш учун етарли имконият ҳамда моддий-техник базага эга эканини баҳолашга қаратилган.
Унинг сўзларига кўра, аккредитация комплекс ва махсус турларга бўлинади. Комплекс аккредитация беш йилда бир марта ўтказилади ва унда инсон ресурслари, моддий-техник база, бошқарув, ахборот технологиялари каби йўналишлар белгиланган мезонлар асосида баҳоланади.
Шунингдек, жараён доирасида ходимлар, талабалар ва иш берувчилар ўртасида сўровномалар ўтказилади. Ўрганишлар якунида ишчи гуруҳ таълим муассасасининг белгиланган талабларга мувофиқ ёки номувофиқлиги бўйича хулоса беради.
Институт ўқув ишлари бўйича проректори Ҳусниддин Хонқуловнинг қайд этишича, давлат аккредитацияси таълим ташкилоти фаолиятининг давлат таълим стандартлари ва таълим дастурларига мувофиқлигини аниқлашга қаратилган жараён ҳисобланади.
Комплекс давлат аккредитацияси доирасида институт 8 та асосий мезон бўйича баҳоланади: ташкилий-бошқарув фаолияти, таълим сифатини таъминлаш, талабалар фаолияти, ўқув жараёнини ташкил этиш, инсон ресурслари, илмий-тадқиқот ишлари, талабаларни қўллаб-қувватлаш ҳамда моддий-техник таъминот.
Аккредитация натижалари институтнинг келгусидаги фаолияти, жумладан, муайян таълим дастурлари бўйича талабалар қабул қилиш ва уларга таълим беришни давом эттириш ҳуқуқига таъсир қилади.
Ҳамкорлик материали
