Самарқанд шаҳрида фаолият юритувчи оилавий корхона вакили тегишли ваколатга эга бўлмаган ҳолда фуқарони ва унинг икки нафар қариндошини Саудия Арабистонига «Умра» зиёратига юборишни ваъда қилган. Бунинг эвазига у 3450 АҚШ доллари талаб қилиб, шундан 3000 долларни олган вақтида ДХХ ва ИИБ ходимлари томонидан ашёвий далиллар билан ушланган.
Ҳолат юзасидан унга нисбатан жиноят иши қўзғатилиб, дастлабки тергов ҳаракатлари олиб борилмоқда.
Шунга ўхшаш ҳолат Наманган вилоятида ҳам аниқланган. Хусусан, Наманган туманида фаолият юритувчи масъулияти чекланган жамият раҳбари Учқўрғон туманида яшовчи фуқарони ноқонуний равишда «Умра» зиёратига юборишни ваъда қилган. Ушбу хизмат учун 1350 АҚШ доллари талаб қилиниб, олдиндан 1200 доллар олинган вақтда ДХХ ва ИИБ ходимлари томонидан ашёвий далиллар билан ушланган.
Айни пайтда мазкур ҳолат юзасидан терговга қадар текширув ҳаракатлари олиб борилмоқда.
Фуқаролардан «Умра» зиёратини ташкил этишни таклиф қилаётган шахс ва ташкилотларнинг тегишли лицензияси мавжудлигини текшириш, шубҳали таклифларга алданмаслик ҳамда пул тўлашда эҳтиёткор бўлиш сўралмоқда.
