Мақолада Малайзия Халқаро ислом университети (IIUM) профессори Шукрон Абдураҳмоннинг “From Samarqand with Love: A Memoir Across Six Cities” (“Самарқанддан муҳаббат ила: Олти шаҳар оша хотиралар”) номли китоби нашрдан чиққани баён этилган. 

Асар муаллифнинг Самарқанддаги илмий фаолияти ва Ўзбекистонда орттирган маънавий таассуротларини ўзида мужассам этган муҳим мемуарлар тўплами сифатида эътироф этилмоқда.

Мазкур китоб профессор Шукрон Абдураҳмоннинг Имом Бухорий халқаро илмий-тадқиқот марказидаги илмий амалиёти давомида ёзилган бўлиб, 2025 йил сентябрь ойида якунланган ҳамда Марказдаги якуний илмий тақдимоти чоғида кенг жамоатчиликка таништирилган.

Асар анъанавий илмий тадқиқот эмас, балки муаллиф ва унинг оиласи томонидан қаламга олинган самимий хотиралар, кузатувлар ва ҳаётий хулосалардан иборат. Китобда Самарқанд, Тошкент, Бухоро, Макка, Мадина ва Истанбул шаҳарлари орқали кечган сафарлар тасвирланиб, уларнинг тарихий, маънавий ва маданий аҳамияти кенг ёритилади.

Муаллиф саёҳатни инсоннинг маънавий камолоти, тафаккури ва ҳаётий тажрибасини бойитувчи муҳим омил сифатида талқин этади. Қуръони каримнинг Ер юзи бўйлаб сафар қилиш ва Аллоҳнинг оятлари ҳақида тафаккур юритишга чорловчи оятларидан илҳомланган ҳолда, турли халқлар маданияти, тарихий мероси ҳамда оддий инсонлар билан учрашувлар Пайғамбаримиз Муҳаммад соллаллоҳу алайҳи васалламнинг юксак ахлоқи билан боғлаб талқин қилади.

Китоб ўқувчиларни иймон, шукроналик, оилавий қадриятлар, дўстлик, камтарлик ва меҳр-оқибат каби умуминсоний фазилатлар ҳақида чуқур мулоҳаза юритишга чорлайди. Шу жиҳатдан асар нафақат шахсий хотиралар тўплами, балки маърифий ва маънавий аҳамиятга эга бўлган муҳим манба сифатида ҳам қадрлидир.

Профессор Шукрон Абдураҳмон китобда Имом Бухорий халқаро илмий-тадқиқот маркази раҳбарияти ва жамоасига самимий меҳмондўстлик ва юксак илмий муҳит учун алоҳида миннатдорлик билдирган.

IslamiCity порталида эълон қилинган мақолада Имом Бухорий халқаро илмий-тадқиқот маркази жамоаси номидан китоб муаллифи муваффақиятли нашр билан самимий муборакбод этилади.

Мазкур асар Ўзбекистон ва Малайзия ўртасидаги илмий-маърифий ҳамкорлик, ўзаро ҳурмат ва маданий мулоқотнинг яна бир ёрқин намунаси бўлиб, Самарқанднинг бой илмий ва маънавий муҳити халқаро олимлар учун беназир илҳом манбаи бўлиб қолаётганини яна бир бор тасдиқлайди.

Ўз мухбиримиз