Бу ҳақда Олий таълим, фан ва инновациялар вазирлиги маълум қилди.
Тартибга кўра, SAT'дан 1200 ва ундан юқори балл тўплаган абитуриентлар учун қўшимча давлат гранти ўринлари кундузги таълим шаклидаги, фанлар мажмуаси «математика» ва «чет тили» бўлган бакалавриат йўналишлари қабул параметрининг 50 фоизи миқдорида ажратилади.
Қарорга мувофиқ:
- қабул параметрининг 50 фоизи бутун сон бўлмаган тақдирда, қўшимча грант ўринлари юқори томонга яхлитланади;
- имтиёздан рўйхатдан ўтишда «математика» ва «чет тили» фанларини танлаган ҳамда 2026 йил 25 июнга қадар (шу куни ҳам) DI-код орқали SAT сертификати Билим ва малакаларни баҳолаш агентлигига келиб тушган абитуриентлар фойдаланиши мумкин;
- қўшимча давлат гранти учун саралашда асосий мезон SAT сертификатидаги балл ҳисобланади;
- абитуриентлар танлаган бештагача олий таълим муассасаси ва таълим йўналишига SAT баллари қатъий кетма-кетлиги асосида тавсия этилади;
- агар қўшимча грантнинг охирги ўрнидаги абитуриент билан кейинги абитуриент(лар)нинг SAT балли тенг бўлса, улар ҳам талабаликка тавсия этилади;
- SAT сертификатига эга абитуриентлар имтиёздан фойдаланиш ёки умумий тартибда тест натижалари асосида танловда иштирок этишни мустақил танлаши мумкин;
- SAT орқали танланган бешта йўналишнинг бирортасига ҳам тавсия этилмаган абитуриентлар учун бўш қолган қўшимча грант ўринларига қабул натижалари эълон қилинганидан сўнг бир ҳафта ўтиб, яна бир ҳафта давомида қайта рўйхатдан ўтиш имконияти яратилади;
- Билим ва малакаларни баҳолаш агентлигининг қайдномалари мазкур абитуриентларни талабаликка қабул қилиш бўйича тегишли ҳужжатларни расмийлаштириш учун асос бўлади.
