Қайд этилишича, бозор инфратузилмасини такомиллаштириш, савдо ва хизмат кўрсатиш сифатини ошириш бўйича кенг кўламли ишлар амалга оширилмоқда.
Бугунги кунда бозор ҳудудида замонавий «Ситуацион марказ» ташкил этилган. У орқали ҳудудга кириб-чиқаётган автотранспорт воситалари ҳаракати, савдо жараёнлари, автотураргоҳлар бандлиги, кузатув камералари орқали хавфсизлик ҳолати ҳамда тадбиркорлик субъектлари фаолиятини онлайн мониторинг қилиш имконияти яратилмоқда.
Шунингдек, рақамли назорат тизимини жорий этиш доирасида «ақлли камера»лар ўрнатиш ва кабель тармоқларини тортиш ишлари босқичма-босқич амалга ошириляпти. Янги тизим орқали бозорга кириб-чиқувчи транспорт воситалари ҳисоби юритилиши, давлат рақам белгилари аниқланиши ҳамда автомобилларнинг савдо майдонларига жойлашуви назорат қилиниши кўзда тутилган.
Бозор ҳудудида бошқарув ва рақамлаштириш тизимини самарали йўлга қўйиш мақсадида ҳудуд 9 та функционал блокка ажратилди. Жумладан, айрим ҳудудлар автотранспорт воситалари савдоси учун, бошқалари эса вақтинчалик ва доимий автотураргоҳ сифатида қайта ташкил этилди. Маъмурий бинолар ҳамда эҳтиёт қисмлари савдоси учун алоҳида ҳудудлар белгиланди.
Инфратузилмани тартибга келтириш ишлари доирасида омборхоналар ва автосервислар қайта ташкил этилиши режалаштирилган. Ҳудудда тартибсиз жойлашган контейнерлар хатловдан ўтказилиб, уларнинг 100 дан ортиғи тартибли жойлаштирилди. Тадбиркорлар учун қулай шароит яратиш мақсадида замонавий талаблар асосида «намунавий контейнер» намунаси ҳам тайёрланди.
Шу билан бирга, бозорга кириш учун қўшимча ёндош йўл лойиҳаси ишлаб чиқилди. Ҳудудда асфальтлаш ишлари олиб борилмоқда ва автотранспорт воситалари учун янги жойлашув ўринлари ташкил этиляпти.
Бозор ҳудудидаги савдо дўконлари, хизмат кўрсатиш шохобчалари ва иншоотлар солиқ ҳамда кадастр мутахассислари иштирокида қайта хатловдан ўтказилмоқда.
Фуқароларга қўшимча қулайлик яратиш мақсадида автомобилларни олдиндан жойлаштириш имконини берувчи Cлиcк Авто мобил иловаси ишлаб чиқилди. Айни пайтда дастурга тегишли маълумотларни киритиш ишлари давом этмоқда.
