Соғлиқни сақлаш вазири Элдор Адилов Тошкент халқаро инвестиция форумига ташриф буюрган Ўзбекистон – Саудия Ишбилармонлар кенгаши ҳамраиси,“ACWA” компанияси бошқаруви раиси Муҳаммад Абунайян ҳамда “Vision International Investment Company” компанияси президенти ва бош ижрочи директори Омар Ал-Мидани бошчилигидаги делегация билан учрашув ўтказди.
Мулоқотда ўзаро ҳамкорлик алоқаларини янада кенгайтириш ва қўшма лойиҳаларни жадаллаштириш масалалари муҳокама қилинди.
Қайд этилганидек, Президентимизнинг тегишли қарорига мувофиқ Фарғона вилоятида давлат-хусусий шериклик асосида 800 ўринли замонавий кўп тармоқли шифохона қурилиши режалаштирилган.
Бундан бир муддат олдин вазирлик ҳамда тендер ғолиби бўлган хусусий шерик — “Vision International Investment Company” (Саудия Арабистони) ва “KOS Construction Mekanik Elektrik Fe LLC” (Ўзбекистон) компанияларидан иборат консорциум ўртасида имзоланган битим мазкур лойиҳани амалий босқичга олиб чиқиш йўлидаги муҳим қадам бўлди.
Янги кўп тармоқли муассаса ҳудуддаги бешта мавжуд ихтисослаштирилган марказ филиалини ягона комплексга бирлаштиради.
Фарғона ва унга туташ вилоятлар ҳамда қўшни республикалар аҳолисига кардиожарроҳлик, нейрожарроҳлик, органлар трансплантацияси, нефрология, ортопедия каби қатор йўналишларда халқаро стандартлар даражасида хизмат кўрсатади.
Шунингдек, мажмуа таркибида 160 ўринли интенсив терапия ва шошилинч тиббий ёрдам бўлимлари ҳамда барча ёрдамчи клиник хизматлар бўлиши кўзда тутилган.
Қолаверса, лойиҳа доирасида бу ерда ҳамширалар тайёрлаш мактаби, тиббиёт университети ва меҳмонхона барпо этиш орқали тиббий таълим, илм-фан ва амалиётни уйғунлаштирган “Фергана Плус” замонавий тиббий таълим кластери яратилади.
Учрашувда мазкур тиббий таълим кластерини ташкил этиш бўйича шартнома имзоланди.
Томонлар ушбу лойиҳа Ўзбекистон ва Саудия Арабистони ўртасидаги кенг қамровли шериклик ва дўстона муносабатларни янада мустаҳкамлаш баробарида, мамлакатимизда тиббий хизматлар сифатини юқори босқичга олиб чиқишига ишонч билдирди.
