Қарор лойиҳасига мувофиқ, икки вилоят ўртасидаги умумий узунлиги 209,15 километр бўлган маъмурий-ҳудудий чегара чизиғини тасдиқлаш назарда тутилган.

Чегараларни белгилашда замонавий картографик материаллар, аэросуратлар ҳамда давлат координаталари тизимига боғланган топографик хариталардан фойдаланилган.

Қайд этилишича, чегара чизиқларини белгилашда ердан фойдаланувчиларга тегишли яйлов ва лалми ер майдонларининг яхлитлигини сақлаш, шунингдек, уларни табиий рельеф элементларига мувофиқ ажратиш тамойилларига амал қилинган.

Мазкур қарорнинг қабул қилиниши ер ва кадастр муносабатларида юзага келиши мумкин бўлган тушунмовчиликларнинг олдини олиш, ер участкалари ва кўчмас мулк объектларини ҳисобга олишда аниқликни таъминлашга хизмат қилиши кутилмоқда.

Шунингдек, ҳужжат давлат органлари ўртасида ҳудудий ваколатларни аниқ белгилаш ва ҳудудий бошқарув самарадорлигини ошириш учун ҳуқуқий асос яратади.