Аму-Сурхон ирригация тизимлари ҳавза бошқармаси матбуот хизматининг маълум қилишича, ҳолат Сурхондарё вилоятининг Бойсун тумани ҳудудидаги Хангаронсой сойи билан боғлиқ.
Ушбу ҳудудда бурғулаш ишлари вақтида чиққан нефть хомашёсини тўплаш учун вақтинчалик ҳовузлар барпо этилган бўлиб, улар ERIELL Group томонидан ташкил қилинган.
23 апрель куни кузатилган кучли ёғингарчилик натижасида сойда сув кўпайиб, вақтинчалик дамбалардан тошиб ўтган. Оқибатда нефть аралашган сувлар қуйи ҳудудларга тарқалиб, Сурхондарё дарёсигача етиб борган.
Қайд этилишича, шу куннинг ўзида мутахассислар томонидан дамбалар тикланиб, нефть оқиб чиқиши тўлиқ бартараф этилган.
Ҳозирда сув хўжалиги ташкилотлари томонидан сел-тошқин хавфи мавжуд ҳудудларда назорат кучайтирилган, кечаю-кундуз навбатчилик йўлга қўйилган.
