“Мен администрациядан фалончиман, афғонистонлик тадбиркор Термиз шаҳридаги “Дипломат” ресторани ҳудудига кўп қаватли уй қурмоқчи, шунга рухсат олишда амалий ёрдам керак”, деди қўнғироқ қилаётган одам. Бу шахс Экоқўмитада Департамент бошлиғи бўлиб чиқди.
Тошкентда ўзини Президент администрацияси ходими сифатида таништириб, афғонистонлик тадбиркорнинг ишини ҳал қилиб бериш мақсадида Сурхондарё вилоят ҳокимига қўнғироқ қилган давлат хизматчиси озодликдан маҳрум этилди.
Kun.uz танишган суд ҳукмига кўра, 38 ёшли И.Ж. Экология ва иқлим ўзгариши миллий қўмитасида Департамент бошлиғи лавозимида ишлаган. 2026 йил апрел-май ойларида И.Ж.га собиқ қўшниси бўлган афғонистонлик тадбиркор Термиз шаҳридаги ресторан ўрнида кўп қаватли уй қурмоқчилигини айтиб, шунга Сурхондарё вилоят ҳокимидан рухсат олишда ёрдам сўраган.
И.Ж. президент ёрдамчиси Б.Мавлоновнинг “Комил” исмли котиби борлиги ҳақида аввалдан билган. 2026 йил 2 июн куни кечки пайт Сурхондарё вилоят ҳокими Улуғбек Қосимовнинг телефон рақамига қўнғироқ қилиб, ўзини “Администрациядан Комилман”, дея таништирган. Сўнгра ҳокимдан хорижий корхонага доимий фойдаланиш ҳуқуқи асосида тегишли ҳудуддаги “Дипломат” ресторани ўрнида “дом” қуришга рухсат беришни сўраган.
И.Ж. судда айбига иқрор бўлмаса-да, вилоят ҳокимига ўзини “Администрациядан Комил” исмли шахс сифатида таништирганини тан олган.
“Экология ва иқлим ўзгариши миллий қўмитасида Департамент бошлиғи лавозимида ишлаб келаман. 2026 йил май ойи бошларида миллати афғон бўлган собиқ қўшним қўнғироқ қилиб, кўришиб олишни таклиф этди.
Суҳбат давомида у менга Термиз шаҳрида вилоят ҳокимлиги биноси яқинида ўзларига тегишли 50 сотих ер майдонида жойлашган ресторан ўрнига кўп қаватли турар жой қуришни режалаштирганини, аммо бунинг учун вилоят ҳокими Улуғбек Қосимов рухсат бермаётганини, ҳоким билан гаплашиб, розилигини олиб беришда ёрдам сўради. Унинг гапларини тинглаб, “Ака, майли, мен бир ҳаракат қиламан, вилоят ҳокими билан гаплашиб кўраман” дедим”, деган судланувчи ўз кўрсатмасида.
Шундан сўнг И.Ж. Улуғбек Қосимовга қўнғироқ қилган ҳамда ўзини Президент администрациясидан “Комил” деб таништирган.
“Термиз шаҳрида вилоят ҳокимлиги ёнидаги “Дипломат” номли ресторан ҳудудига бир тадбиркор кўп қаватли турар жой қурмоқчи экан. Аммо у ерга кўп қаватли турар жой қуриш учун сизнинг розилигингиз керак экан. Шу масалада амалий ёрдам керак”, деган И.Ж. ҳокимга.
Улуғбек Қосимовнинг жавоби эса шундай бўлган:
“Комил ака, бу масаладан хабарим бор. Сабаби ушбу афғон тадбиркор менга мурожаат этган. Аммо мен унга ҳолатни батафсил тушунтирмай, розилик бермаслигимни жавоб қилганман. Аммо агарда ушбу тадбиркор Термиз шаҳрининг бошқа ҳудудидан кўп қаватли турар жой қуриш истагида бўлса, ер майдонини ажратиб беришда ёрдам бераман. Мен унга розилик бермаслигимнинг сабаби, ушбу ресторан ёнида ҳуқуқни муҳофаза қилувчи органларнинг маъмурий бинолари мавжуд”.
И.Ж. ҳолатни тушунганини айтиб, суҳбатни якунлаган.
“Хизмат сафарига борган вақтимда вилоят ҳокими Улуғбек Қосимовнинг телефон рақамини олгандим. У билан таниш эмасман”, деган судланувчи судда.
Ҳолат И.Ж. ва Сурхондарё вилоят ҳокими Улуғбек Қосимов ўртасида бўлиб ўтган телефон суҳбатидан иборат бир эпизодли бўлган.
ЖИБ Чилонзор туман суди ҳукми билан И.Ж. Жиноят кодексининг 165-моддаси 1-қисми (товламачилик) ва 219-моддаси (ҳокимият вакилига ёки фуқаровий бурчини бажараётган шахсга қаршилик кўрсатиш) 2-қисмида назарда тутилган жиноятларни содир қилишда айбли деб топилган. Унга 3 йил 1 ой муддатга озодликдан маҳрум қилиш жазоси тайинланган. Жазони манзил колонияларда ўташ белгиланган.
Маълумот учун, Жиноят кодексининг 165-моддаси 1-қисми товламачилик, яъни жабрланувчига зўрлик ишлатиш, мулкига шикаст етказиш ёки уни нобуд қилиш ёхуд жабрланувчининг ахборот ресурсини йўқ қилиш, жабрланувчи учун сир сақланиши лозим бўлган маълумотларни ошкор қилиш, уни шарманда қиладиган уйдирмалар тарқатиш билан қўрқитиб ўзгадан мулкни ёки мулкий ҳуқуқни топширишни, мулкий манфаатлар беришни ёхуд мулкий йўсиндаги ҳаракатлар содир этишни талаб қилиш ёхуд жабрланувчини ўзининг мулкини ёки мулкка бўлган ҳуқуқини беришга мажбур қиладиган шароитга солиб қўйишда ифодаланган қилмиш учун жазони назарда тутади.
Жиноят кодексининг 219-моддаси 2-қисми эса ҳокимият вакилининг қандай шаклда бўлмасин ўзининг хизмат вазифасини бажариш ёки фуқаровий бурчини бажаришдан воз кечишга, шунингдек қонунга хилоф ҳаракатлар содир этишга мажбур қилишда ифодаланган қилмиш учун жазони назарда тутади.
