Ҳужжатга кўра, таълим муассасаларида биометрик кириш тизимлари, видеокузатув камералари, “ташвиш” тугмалари ва бошқа замонавий хавфсизлик воситалари босқичма-босқич жорий этилади.
Вазирлар Маҳкамасининг 2026 йил 31 июлдаги 425-сонли “Давлат таълим муассасалари, нодавлат таълим ташкилотлари ва хорижий давлатлар таълим ташкилотлари филиалларининг хавфсизлигини таъминлаш тизимини янада такомиллаштириш чора-тадбирлари тўғрисида”ги қарори қабул қилинди.
Қарорга кўра, давлат таълим муассасалари, нодавлат таълим ташкилотлари ҳамда хорижий давлатлар таълим ташкилотлари филиалларида хавфсизликни таъминлаш бўйича қуйидаги чора-тадбирлар амалга оширилади:
– таълим муассасалари хавфсизлик даражасига қараб тоифаларга ажратилиб, ҳар бир тоифа учун қўриқлаш талаблари белгиланади;
– давлат таълим муассасаларида интернет тармоғига таъсир қилмайдиган махсус алоқа канали ташкил этилади;
– қўриқлаш сигнализациялари ва “ташвиш” тугмалари босқичма-босқич ўрнатилиб, ИИВ Қўриқлаш департаментининг мониторинг тизимига уланади;
– асосий кириш жойларига биометрик кириш-чиқишни назорат қилиш тизимлари ўрнатилади, маълумотлар камида 3 ой сақланади;
– видеокузатув тизими бино атрофи, кириш жойлари, ошхона, “ташвиш” тугмалари ўрнатилган ҳудудлар ва қават йўлакларини қамраб олади, видеоёзувлар камида 1 ой сақланади;
– серқатнов йўллар яқинидаги таълим ташкилотлари атрофида пиёдалар учун “яшил йўлаклар” ташкил этилиб, транспорт ҳаракати чекланади;
– қўриқлаш ходимлари махсус ўқув марказларида тайёрланади ва уларнинг малакаси мунтазам ошириб борилади.
Мазкур қарор билан назарда тутилган чора-тадбирлар 2026–2027-йиллар давомида босқичма-босқич амалга оширилади.
