Хусусан, Президентимизнинг 2025 йил 25 июлдаги “Давлат органлари ва ташкилотларида ижро интизомини янада мустаҳкамлашнинг қўшимча чора-тадбирлари тўғрисида”ги фармони ижро интизомини ташкил этишнинг замонавий ва самарали механизмларини қўллашда муҳим ҳуқуқий асос бўлиб хизмат қилмоқда. Мазкур фармон билан қонунлар, Президент фармонлари, қарорлари, фармойишлари ҳамда топшириқлари ижросини назорат қилишнинг таъсирчан тизимини яратиш, ҳудудлардаги ислоҳотлар натижадорлигини баҳолаш, давлат органлари раҳбарларининг шахсий масъулиятини кучайтириш ҳамда ижро жараёнларига сунъий интеллект технологияларини жорий этиш каби устувор вазифалар белгиланди.

Шундан келиб чиққан ҳолда, “Ўзбекгидроэнерго” акциядорлик жамиятида ижро интизомини мустаҳкамлаш, давлатимиз раҳбари ва ҳукумат томонидан белгиланган вазифаларнинг ўз вақтида, сифатли ҳамда тўлиқ бажарилишини таъминлаш бўйича тизимли ишлар қилинмоқда. Жамият фаолиятида Президентимизнинг 2021 йил 10 февралдаги “Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида”ги фармони ҳамда 2021 йил 31 майдаги “Ijro.gov.uz” ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида”ги қарори талаблари асосида ижро интизомини ташкил этишнинг самарали механизми йўлга қўйилган бўлиб, бу жараён доимий равишда такомиллаштириб борилмоқда.

Бугунги кунда жамиятда ижро интизомини таъминлаш рақамли бошқарув тизимлари орқали амалга оширилмоқда. Хусусан, “ijro.gov.uz”, “km.ijro.uz” ва “edo.ijro.uz” электрон платформалари орқали ҳужжатлар ижроси устидан доимий мониторинг олиб борилмоқда. Жамиятда ижро интизомини таъминлаш бевосита масъул раҳбарларнинг доимий назоратида бўлиб, ҳар бир топшириқнинг ижро ҳолати кунлик, ҳафталик ва ойлик кесимларда таҳлил қилинади. Бу жараёнда таркибий тузилмалар фаолияти мувофиқлаштирилиб, белгиланган вазифаларнинг ўз вақтида бажарилиши таъминланмоқда. Айниқса, давлатимиз раҳбарининг фармон, қарор ва топшириқлари ижросини таъминлашда тизимли ёндашув шакллантирилган. Жамият ижро аппаратининг таркибий департамент, бошқарма ва бўлинмалари ҳамда тизим корхоналари иштирокида Президент ва Президент Администрацияси ҳужжатлари, Олий Мажлис палаталари қарорлари, Вазирлар Маҳкамаси ҳужжатлари ва йиғилиш баёнларида белгиланган вазифаларнинг ижроси мунтазам назорат қилиб борилмоқда.

Таҳлилларга кўра, 2017-2026 йиллар давомида “Ўзбекгидроэнерго” АЖга ижро учун жами 175 та ҳужжат келиб тушган бўлиб, уларда жамият масъуллигида амалга оширилиши лозим бўлган 947 та топшириқ белгиланган. Уларнинг 621 таси қарор, 124 таси фармон, 14 таси фармойиш ҳамда 188 таси йиғилиш баёнларида назарда тутилган вазифалардан иборат.

2026 йил 1 июнь ҳолатида мазкур топшириқларнинг 689 таси тўлиқ бажарилиб, ижроси таъминланган. Бажарилган вазифалар таркибида 421 та қарор, 88 та фармон, 12 та фармойиш ва 168 та йиғилиш баёни топшириқлари мавжуд. Бу эса АЖ томонидан давлат раҳбари ҳужжатларида белгиланган вазифаларнинг қарийб 73 фоизи тўлиқ ижро этилганини кўрсатади.

Айни вақтда 254 та топшириқ белгиланган муддатлар доирасида бажарилиш жараёнида бўлиб, уларнинг ҳар бири бўйича аниқ чора-тадбирлар режаси ишлаб чиқилган. Муҳими, мазкур топшириқларнинг барчаси белгиланган графиклар асосида бажарилмоқда.

Жорий йил январь-май ойларида давлатимиз раҳбари топшириқлари ижросини ўз вақтида таъминлаш мақсадида “Ўзбекгидроэнерго” АЖ томонидан бешта алоҳида “йўл харитаси” ва кунбай кесимдаги бешта “календарь график” ишлаб чиқилди. Мазкур ҳужжатлар Вазирлар Маҳкамаси ва Энергетика вазирлиги билан келишилган ҳолда тайёрланиб, уларда назарда тутилган барча вазифалар ижроси тўлиқ таъминланди. Натижада “ijro.gov.uz” ҳамда “km.ijro.uz” тизимларида жамият масъуллигида бўлган бирорта ҳам бажарилмаган топшириқ мавжуд эмас. Бу кўрсаткич “Ўзбекгид­роэнерго” АЖда ижро интизомини ташкил этиш ва назорат қилиш ишлари юқори даражада йўлга қўйилганини, масъул ходимлар ва раҳбарлар томонидан топшириқлар ижросига алоҳида эътибор қаратилаётганини яққол намоён этади.

2026 йилнинг беш ойида “ijro.gov.uz” тизими орқали жамият ижросига жами 131 та топшириқ келиб тушди. Шундан 92 таси Президент, 19 таси Президент Администрацияси, 20 таси Вазирлар Маҳкамаси ҳужжатлари ҳамда 58 таси ҳукумат комиссиялари баёнларида белгиланган вазифалардан иборат бўлди. Уларнинг ҳар бири бўйича масъул ижрочилар белгиланиб, бажарилиши таъминланди ва белгиланган тартибда назоратдан чиқарилди.

Жамиятда ҳужжатлар айланмаси ва бошқарув жараёнларини рақамлаштириш борасида ҳам кенг кўламли ишлар амалга оширилмоқда. Хусусан, “edo.ijro.uz” электрон платформаси орқали
2026 йил январь-май ойларида жами 9532 та ҳужжат айланмаси қайд этилди. Шундан 5226 таси келиб тушган, 4306 таси эса ишлаб чиқилган ҳужжатларни ташкил этди. Келиб тушган ҳужжатлар таркибида Президент Администрациясидан 33 та, Вазирлар Маҳкамасидан 98 та, вазирлик ва идоралардан 840 та, маҳаллий давлат ҳокимияти органлари ҳамда ҳуқуқни муҳофаза қилувчи ташкилотлардан 253 та, тизим корхоналаридан 2649 та, бошқа ташкилотлар ва хорижий ҳамкорлардан 849 та, жисмоний ва юридик шахслардан 81 та мурожаат қабул қилинди. Шунингдек, давлат сирларини муҳофаза қилиш талабларига мувофиқ махсус тартибда кўриб чиқиладиган ҳужжатлар билан ишлаш ҳам қатъий назорат асосида ташкил этилди.

Ишлаб чиқилган ҳужжатлар таркибида кенгаш қарорлари, ишлаб чиқариш ва кадрларга оид буйруқлар, йиғилиш баёнлари, чора-тадбирлар режалари, чиқиш хатлари, факсограммалар ҳамда ички хизмат ёзишмалари муҳим ўрин эгаллади. Бу эса жамиятда бошқарув қарорларини қабул қилиш ва уларнинг ижросини таъминлаш жараёнлари рақамли муҳитга тўлиқ интеграция қилинганини кўрсатади.

Бугунги кунда жамиятнинг ички бошқарув тизимида қабул қилинаётган барча ҳужжатлар ижроси ҳам электрон платформа орқали мониторинг қилиб борилмоқда. Жумладан, 29 та йиғилиш баёни бўйича белгиланган 1844 та топшириқнинг ижроси ҳар куни таҳлил қилиниб, масъул ижрочилар фаолияти мувофиқлаштирилмоқда. Аппарат йиғилишлари, техник йиғилишлар, буйруқлар, бошқарув қарорлари ҳамда махсус топшириқлар билан белгиланган вазифалар ижроси юзасидан тизимли мониторинг йўлга қўйилган бўлиб, ҳар бир топшириқнинг бажарилиш ҳолати мунтазам таҳлил қилинмоқда. Бунда ижро муддатларига қатъий риоя этиш, вазифаларнинг сифатли ва натижадор бажарилишини таъминлашга алоҳида эътибор қаратилмоқда.

Президентимиз томонидан белгиланган вазифалардан келиб чиққан ҳолда “Ўзбекгидроэнерго” АЖ келгусида ҳам ижро интизомини янада кучайтириш, рақамли назорат воситаларини кенгайтириш, масъул ходимлар малакасини ошириш ва давлат раҳбари топшириқларининг сўзсиз ижросини таъминлашга қаратилган ишларни изчил давом эттиради. Зеро, ижро интизоми ҳар қандай ислоҳотнинг амалий натижасини таъминлайдиган, давлат ва жамият тараққиётини белгилайдиган энг муҳим омиллардан биридир.

Шодмон РАСУЛОВ,

“Ўзбекгидроэнерго” АЖ

назорат бўлими бош мутахассиси