Маълум қилинишича, «Ташқи ёзувларни тартибга солиш тўғрисида»ги низомни тасдиқлашни назарда тутувчи мазкур ҳужжат ташқи ахборот воситаларини тизимли тартибга солиш, уларни ўрнатиш ва фойдаланиш устидан назоратни кучайтиришга қаратилган.
Қайд этилишича, амалда турли келишмовчиликларга сабаб бўлаётган айрим тушунчаларга аниқлик киритилмоқда. Хусусан, «ташқи ахборот воситаси», «ташқи ёзув», «ахборот кўрсаткичи», «пешлавҳа», «эълон» ва «маълумотлар тахтаси» каби атамаларга расмий таъриф берилиши кўзда тутилган.
Лойиҳага кўра, ташқи ахборот воситалари ва ташқи ёзувлар тижорат мақсадини кўзламаган, реклама хусусиятига эга бўлмаган ахборот воситалари ҳисобланади. Шу боис уларга реклама ёки тижорий мазмундаги тасвирларни жойлаштиришга йўл қўйилмайди.
Шунингдек, савдо, умумий овқатланиш ва маиший хизмат кўрсатиш объектларидаги пешлавҳалар — масалан, «дорихона», «сартарошхона», «супермаркет» ёки «миллий таомлар» каби ёзувлар ташқи реклама объекти ҳисобланмаслиги белгиланмоқда.
Яъни, тадбиркор ўз биноси ташқи қисмида фаолият тури ёки ташкилот номи ҳақида маълумот жойлаштирса, бу реклама сифатида баҳоланмайди ва реклама паспортини расмийлаштириш ёки тўлов амалга ошириш талаб қилинмайди.
Ҳужжатда реклама тушунчасига ҳам аниқлик киритилган. Унга кўра, маҳсулот ёки хизматга қизиқиш уйғотиш, уни бозорда илгари суриш ва фойда олиш мақсадида тарқатиладиган махсус ахборот реклама ҳисобланади.
Таъкидланишича, хусусий биноларда ташқи реклама конструкцияларини жойлаштириш ҳуқуқини берувчи реклама жойи паспорти маҳаллий ҳокимликлар томонидан, Тошкент шаҳрида эса ҳокимлик ҳузуридаги Рақамли ривожланиш департаменти орқали расмийлаштирилади.
Рақобат қўмитаси эса реклама контентининг қонунчилик талабларига мувофиқлиги устидан давлат назоратини амалга оширади.
Қўмита тадбиркорлар, компаниялар, фуқаролик жамияти институтлари ва кенг жамоатчиликни мазкур лойиҳа муҳокамасида фаол иштирок этишга чақирди.
Маълумот учун, лойиҳа муҳокамаси 25 апрель куни бошланган бўлиб, 10 майга қадар давом этади.
