Олий таълим, фан ва инновациялар вазирлиги маълумотига кўра, аризалар 25 июлга қадар (шу куни ҳам) my.edu.uz платформаси орқали онлайн қабул қилинади.
Қайд этилишича, рўйхатдан ўтиш жараёнида абитуриентлардан дипломнинг асл нусхаси талаб этилмайди. Фақат шахсни тасдиқловчи маълумотларни киритиш кифоя бўлиб, зарур маълумотлар тизим томонидан автоматик шакллантирилади.
Техникумни муваффақиятли тамомлаганлар тоифасига ўқиш давомида барча семестрлар бўйича ўзлаштириш баҳолари «5» ва «4» бўлган, шунингдек, баҳоларининг камида 50 фоизи «5» (аъло), тиббиёт йўналишлари учун эса камида 85 фоизи «5» бўлган битирувчилар киради.
Суҳбат натижаларига кўра, олий таълим муассасаси комиссияси аъзолари томонидан қўйилган балларнинг ўртача кўрсаткичи 67 балл ёки ундан юқори бўлган абитуриентлар суҳбатдан ўтган деб ҳисобланади ва тўлов-контракт асосида 2-босқичга талабаликка тавсия этилади.
Мазкур тартиб олий ҳарбий ва олий ҳарбийлаштирилган таълим муассасалари, Тошкент давлат юридик университети, шунингдек, Ўзбекистонда фаолият юритаётган хорижий ва нодавлат олий таълим ташкилотлари ҳамда уларнинг филиалларига татбиқ этилмайди.
Техникум битирувчилари ОТМларнинг 2-босқичидан ўқишни давом эттириши мумкин бўлган ўз соҳасига мос бакалавриат таълим йўналишлари рўйхати бу ерда.
