Махсус комиссия томонидан олиб борилаётган доимий мониторинг натижаларига кўра, миллий стандарт бўйича «яшил» кунлар сони 3 тадан 14 тага кўпайган. «Зарғалдоқ» ва «қизил» кунлар эса 16 тадан 4 тага камайган.
Шу билан бирга, октябрь давомида ҳаво сифати бир маромда бўлмаган. Ойнинг дастлабки 20 кунида кўрсаткичлар ўтган йилга нисбатан анча яхши бўлган бўлса, 25–31 октябрь кунлари ҳаво сифати яна ёмонлашган.
Бу ҳолат ҳароратнинг пасайиши, шамолнинг сустлиги, ҳарорат инверсиясининг тез-тез кузатилиши ва ёғингарчиликнинг етарли бўлмагани билан изоҳланади. Бундай ноқулай метеорологик шароит ифлослантирувчи моддаларнинг тарқалишини чеклаб, уларнинг шаҳар ва унинг атрофида тўпланишига сабаб бўлган.
Октябрь давомида PM2.5 таркибини аниқлаш учун олинган 60 та намуна лаборатория таҳлилидан ўтказилган. Натижаларга кўра, саноат, транспорт ва энергетика соҳаларида ёқилғи ёқилиши билан боғлиқ компонентлар ўртача 44,4 фоизни, табиий чанг эса 42,6 фоизни ташкил этган. Ой охирида ҳаво сифати ёмонлашган кунларда ҳам ушбу улушларда кескин ўзгариш кузатилмаган.
Шундай қилиб, 2026 йил октябрь ойида Тошкентда ҳаво сифати ўтган йилнинг мос даврига нисбатан 16 фоизга яхшиланган. Бироқ ойнинг сўнгги ҳафтасидаги ёмонлашув шамолсизлик ва ҳарорат инверсияси каби омиллар ҳаводаги ифлослантирувчи моддалар тўпланишига таъсир кўрсатишини яна бир бор намоён этди.
