Шу муносабат билан Тошкентдаги “Hyatt Regency” меҳмонхонасида Ўзбекистон ва Маврикий туризм тадбиркорларининг икки томонлама очиқ мулоқоти бўлиб ўтди. Тадбир “Prestige Travel” компанияси ташаббуси билан Туризм қўмитаси ҳамкорлигида ташкил этилди.

Унда Маврикийнинг етакчи туризм компаниялари ва меҳмонхона брендлари вакиллари, шунингдек, маҳаллий туроператорлар иштирок этди. Учрашувда икки томонлама туризм лойиҳаларини йўлга қўйиш ва ҳамкорликни ривожлантириш масалалари муҳокама қилинди.

Дастлабки босқичда 26 декабрь ва январь ойларида жами 4 та Тошкент — Маврикий — Тошкент қатновини амалга ошириш режалаштирилган. 2027 йил июнидан эса мазкур йўналиш бўйича ҳафтасига бир марта мунтазам рейсларни йўлга қўйиш кўзда тутилмоқда.

Янги йўналиш Ўзбекистон учун Африка қитъасида янги туризм бозорини очиш билан бирга, Тошкентнинг Марказий Осиё ва МДҲ давлатларидан Маврикийга йўловчилар оқимини йўналтирувчи транзит марказ сифатидаги салоҳиятини ошириши кутилмоқда. Келгусида Қозоғистон, Россия ва бошқа МДҲ давлатларидан сайёҳлар Тошкент орқали Маврикийга бориши мумкин.

“Prestige Travel” компанияси асосчиси Ойбек Аҳмедовнинг таъкидлашича, янги авиақатновлар икки томонлама сайёҳлар оқимини оширишга хизмат қилиши мумкин. Шунингдек, Маврикий бозори Ўзбекистон туризми учун янги йўналиш сифатида очилади.

Унинг қайд этишича, Маврикий аҳолисининг муайян қисмини ҳинд-мусулмон жамоалари ташкил этиши зиёрат ва гастрономик туризмни ривожлантириш учун имконият яратади. Бу орқали Маврикийдан келадиган сайёҳларга Самарқанд, Бухоро, Хива ва Тошкентнинг тарихий-маданий мероси, ислом цивилизацияси билан боғлиқ қадамжолар ҳамда миллий ошхона анъаналарини қамраб олган махсус туристик маҳсулотларни таклиф этиш имконияти кенгаяди.

Авиақатновлар 2026 йилдан ҳар йили июнь–август ойларида амалга оширилаётган “Очиқ туризм мавсуми” дастури доирасида йўлга қўйилмоқда.

Дастур доирасида янги йўналиш очаётган авиакомпанияларга ҳар бир жалб қилинган хорижий турист учун 100 доллар субсидия ҳамда аэропорт хизматларига 20 фоиз чегирма берилади. Маҳаллий туроператорларга эса узоқ хориждан жалб қилинган ҳар 1000 нафар турист учун 5000 доллар субсидия ажратилади.