Қарорга кўра, 2030 йилгача метро орқали ташиладиган кунлик йўловчилар сонини 1,8 миллион нафарга етказиш, бекатлар сонини 79 тага, линиялар узунлигини эса 103 километргача ошириш режалаштирилган. Шунингдек, поездлар ҳаракати интервалини 2–3 дақиқагача қисқартириш кўзда тутилмоқда.
2028 йил якунига қадар метро бекатларига кириш жойлари ва ўтиш йўлакларида хавфсизлик талабларига риоя қилган ҳолда вендинг аппаратлари ҳамда кичик кўчма савдо объектлари жойлаштирилади.
Метро станциялари олдида автотураргоҳлар ташкил қилиниб, «Park & Ride» тизими йўлга қўйилади. Унга кўра, автотураргоҳдан фойдаланган йўловчиларга метро чипталари бўйича чегирмалар берилиши ва тўловларни чипта орқали қоплаш имконияти яратилади.
Қарор билан хусусий тадбиркорларга метро тоннеллари ва бекатларида аукцион асосида хавфсиз фаолият турлари билан шуғулланишга ҳам рухсат берилади.
Шунингдек, «Тошкент метрополитени» бошқарув тизимига халқаро тажрибани жорий этиш мақсадида хорижлик мутахассислар жалб қилинади.
2026 йил август ойидан халқаро хедхантер ташкилотлари орқали очиқ танловлар эълон қилиниб, 2027 йилдан чет эллик мутахассисларни ишга қабул қилиш бошланади.
2027 йил якунига қадар камида икки нафар раҳбар лавозими халқаро даражадаги мутахассислар билан тўлдирилиши белгиланди.
Бундан ташқари, Тошкент метросида йўлкира ҳақини тўлашнинг янги тизими жорий этилади.
Янги тартибда ҳақ тўлаш босиб ўтилган масофа ёки бекатлар сонига қараб амалга оширилади. Айрим аҳоли тоифалари учун имтиёзлар сақланиб қолади, шунингдек, кунлик, ҳафталик ва ойлик абонементлар тизими йўлга қўйилади.
Янги тизимни 2027 йил 1 январдан амалиётга жорий этиш режалаштирилган.
