Бу Вазирлар Маҳкамасининг 18 августдаги 446-сон қарорида белгиланди.
Қарорга кўра, марказнинг асосий мақсади Ўзбекистоннинг мактабгача таълим соҳасида эришган ютуқларини халқаро ҳамжамиятга етказиш, соҳада минтақавий ва халқаро ҳамкорликни ривожлантириш, илғор тажрибалар ҳамда илм-фан ютуқларини амалиётга жорий этиш орқали мактабгача таълимнинг самарали тизимини яратишдан иборат.
Марказни ташкил этишга 2025 йил 30 октябрь — 13 ноябрь кунлари Самарқанд шаҳрида ўтказилган ЮНЕСКО Бош конференциясининг 43-сессиясида Тошкент шаҳридаги Мактабгача таълим ташкилотлари директор ва мутахассисларини қайта тайёрлаш ва уларнинг малакасини ошириш институтига ЮНЕСКО шафелигидаги II тоифали институт мақомини бериш бўйича қарор қабул қилингани асос бўлган.
Шунингдек, 2026 йил 25 март куни Париж шаҳрида Ўзбекистон Республикаси Ҳукумати ва ЮНЕСКО ўртасида Ўзбекистонда ЮНЕСКО шафелигидаги II тоифали мактабгача таълим марказини очиш тўғрисида битим имзоланган.
Янги тузилманинг асосий вазифалари қаторида мактабгача таълим соҳасида минтақавий ва халқаро ҳамкорликни ривожлантириш, ЮНЕСКОга аъзо мамлакатларнинг мактабгача таълим дастурлари ва усуллари бўйича қўшма тадқиқотлар ўтказиш, болаларни эрта ривожлантиришга қаратилган таълим дастурларини ишлаб чиқиш ва жорий этишда иштирок этиш белгиланган.
Шу билан бирга, 2030 йилгача мактабгача таълим соҳасидаги Тошкент декларацияси ижроси юзасидан мониторинг олиб бориш ва даврий ҳисоботлар тайёрлаш, педагог кадрларни қайта тайёрлашда янги ёндашувларни жорий этиш бўйича таклифлар ишлаб чиқиш, халқаро тренинг, семинар ва конференциялар ташкил этиш ҳам марказ вазифалари ҳисобланади.
Қарорга мувофиқ, марказ юридик шахс мақомига эга бўлмаган Мактабгача таълимни ривожлантириш минтақавий маркази сифатида ташкил этилади. Унинг фаолияти учун Мактабгача ва мактаб таълими вазирлиги тизими ходимларининг белгиланган умумий штат бирликлари доирасида 16 та бошқарув штат бирлиги ажратилади.
Марказ фаолиятини мувофиқлаштириш учун Бошқарув кенгаши ташкил этилади. Унга Мактабгача ва мактаб таълими вазири томонидан тайинланадиган директор раҳбарлик қилади.
Марказ Тошкент шаҳри Яккасарой тумани, Юсуф Хос Ҳожиб кўчаси, 64-уй манзилида жойлашган институт биносида текин фойдаланиш ҳуқуқи асосида жойлаштирилади. Марказ директорига институт проректори, ходимларига эса институт ходимлари учун белгиланган меҳнат ҳақи тўлаш ва моддий рағбатлантириш шартлари татбиқ этилади.
Марказни ташкил этиш ва унинг фаолияти билан боғлиқ харажатлар 2026 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Мактабгача ва мактаб таълими вазирлигига ажратиладиган маблағлар доирасида амалга оширилади. 2027 йилдан бошлаб эса ушбу харажатлар Давлат бюджети параметрларида назарда тутилади.
