1957 йилда ташкил этилган марказ қарийб 70 йил давомида педагогларнинг касбий салоҳиятини оширишга хизмат қилиб келган. Ҳар йили унда қарийб 7,5 минг нафар ўқитувчининг малакаси ошириб келинган.
Янги бинода йилига 12 минг 250 нафардан зиёд педагогнинг малакасини ошириш имконияти яратилди. Бу ерда замонавий технологиялар, махсус лабораториялар, STEAM хоналари, профессионал видеостудия ва компьютер хоналари мавжуд.
Шунингдек, 50 та йўналиш бўйича малака ошириш курсларини ташкил этиш, педагоглар учун 100 ўринли ошхона ва 200 ўринли ётоқхонадан фойдаланиш имконияти яратилган.
Марказ Франция, Туркия ва Озарбайжоннинг таълим ташкилотлари билан ҳамкорликни йўлга қўйган бўлиб, халқаро тажриба алмашинувини ривожлантиришга ҳам хизмат қилади.
Марказнинг очилиш маросимида Тошкент вилояти ҳокими Зойир Мирзаев, мактабгача ва мактаб таълими вазири Эъзозхон Каримова, соҳа мутасаддилари ва педагоглар иштирок этди.
