Бу ҳақда пойтахт Ички ишлар бош бошқармаси маълум қилди.

Маълумотларга кўра, гумонланувчининг икки оиласи бўлган. Иккинчи аёли биринчи оиласи ҳақида билиб қолгач, улар ўртасида мунтазам келишмовчиликлар юзага келган. 37 ёшли аёл эркакни фарзандлари ва ўзини кўп қаватли уйдан ташлаб юбориш билан қўрқитиб келгани айтилмоқда.

Эркак ушбу вазиятдан чиқиш мақсадида бир шахс билан 10 минг доллар эвазига аёлини ўлдириш бўйича келишган. У ёлланган шахсга аёлининг яшаш манзили, кундалик ҳаракатланиш йўналиши ҳамда автомашинаси ҳақида маълумотлар берган. Шунингдек, 2 минг доллар аванс тўлаб, қолган пулни иш бажарилгандан кейин беришга ваъда қилган.

26 апрель куни жиноят қидирув ходимлари томонидан аёл ҳаётини сақлаб қолиш мақсадида махсус тезкор тадбир ўтказилган. Ёлланма қотил сифатида жалб қилинган шахс ҳуқуқни муҳофаза қилувчи органлар билан ҳамкорлик қилган.

Тадбир доирасида аёлнинг ўлими саҳналаштирилиб, бу ҳақда буюртмачига хабар берилган. Кейинги учрашувда эркак ваъда қилинган пулнинг бир қисми сифатида 6,5 млн сўм ва Tracker автомашинасини топшириш вақтида ашёвий далиллар билан ушланган.

Ҳозирда мазкур ҳолат юзасидан Жиноят кодексининг 97-моддаси (қасддан одам ўлдириш) билан жиноят иши қўзғатилган. Гумонланувчига нисбатан қамоққа олиш эҳтиёт чораси қўлланган. Тергов ҳаракатлари давом этмоқда.