Бу ҳақда 6 ноябрь куни Самарқандда ўтказилаётган ШҲТ плюс хавфсизлик масалалари бўйича биринчи экспертлар мулоқотида Давлат хавфсизлик хизмати раиси, генерал-полковник Баҳодир Қурбонов маълум қилди.
ДХХ раҳбарининг таъкидлашича, террорчилик ва экстремистик ташкилотлар ўз ғояларини тарқатиш, тарафдорларини ёллаш, терактларни молиялаштириш ва уларни амалга оширишда рақамли технологиялардан тобора фаол фойдаланмоқда.
«Биргина 2026 йилда экстремистик ва террорчилик хусусиятига эга 49 мингдан зиёд интернет-ресурс аниқланган бўлиб, бу 2025 йилги кўрсаткичга (43 мингга яқин) нисбатан 14 фоиз кўпдир», — деди Баҳодир Қурбонов.
Унинг қайд этишича, рақамли трансформация шароитида террорчилик таҳдидларининг янги шаклларини аниқлаш, жумладан, сунъий интеллектдан террорчилик мақсадларида фойдаланишнинг олдини олиш хавфсизлик соҳасидаги устувор вазифалардан бири ҳисобланади.
Шунингдек, ДХХ раиси Ўзбекистонда 2021–2026 йилларга мўлжалланган Экстремизм ва терроризмга қарши курашиш бўйича миллий стратегия доирасида идоралараро ва халқаро ҳамкорлик механизмлари такомиллаштирилганини таъкидлади.
Унинг маълум қилишича, 2026 йилги Глобал терроризм индексида Ўзбекистон 96-ўринни эгаллаган ва минимал хавф тоифасига киритилган.
Самарқанддаги экспертлар мулоқоти доирасида иштирокчилар замонавий хавфсизлик таҳдидларини муҳокама қилиб, халқаро ва минтақавий ҳамкорликни мустаҳкамлашга қаратилган чора-тадбирларни ишлаб чиқиши кутилмоқда.
