Форумда Туркия, Россия, Озарбайжон, Қозоғистон, Қирғизистон, Хитой, Корея, АҚШ, Франция, Индонезия, Буюк Британия, Япония, Канада, Италия, Венгрия ва Тожикистон давлатларидан нуфузли меҳмонлар, хорижий олий таълим муассасалари ректорлари ва проректорлари, профессорлар ва ПҳД олимлар, деканлар, этномузикологлар, тадқиқотчилар, маданият марказлари раҳбарлари, шунингдек, ўқитувчилар ҳамда талабалар иштирок этади.
Мазкур халқаро форум замонавий мусиқа таълимини халқаро стандартлар асосида ривожлантириш, миллий мусиқа меросини жаҳон таълим майдонига интеграция қилиш, инновацион педагогик ёндашувларни оммалаштириш ва таълим тизимига рақамли технологияларни кенг жорий этишга қаратилгани билан алоҳида аҳамият касб этади.
Форум доирасида “Маданият таълимида сунъий интеллектнинг аҳамияти” мавзусида халқаро илмий-амалий конференция ҳам ташкил этилади. Ушбу конференция маданият ва санъат таълими тизимида сунъий интеллект технологияларини жорий этиш, рақамли трансформация жараёнларини жадаллаштириш ҳамда инновацион ўқитиш методларини амалиётга татбиқ этиш масалаларига бағишланади.
Тадбир давомида 80 дан ортиқ илмий ишлар, инновацион лойиҳалар ва амалий тадқиқотлар тақдим этилади.
Форум якунлари бўйича халқаро ҳамкорлик меморандумлари, қўшма таълим дастурлари ва илмий лойиҳаларни амалга ошириш бўйича келишувларни имзолаш режалаштирилган.
“Мусиқа таълими: жаҳон миқёсида ягона майдон сари” халқаро форуми мамлакатимизда мусиқа ва маданият таълимини янги босқичга олиб чиқиш, инновацион ва рақамли ёндашувларни кенг жорий этиш, халқаро академик ҳамкорликни мустаҳкамлаш ҳамда ёш истеъдодларни қўллаб-қувватлашда муҳим аҳамият касб этади.
