Тошкент шаҳар Ички ишлар бош бошқармаси Кибержиноятларга қарши курашиш бошқармаси ходимлари томонидан ўтказилган тезкор-қидирув тадбирлари давомида Миробод тумани, Фарғона 1-тор кўчасидаги хонадон текширилган.
Маълум бўлишича, ушбу бино ойига 9 минг АҚШ долларига ижарага олинган бўлиб, унда яширин фаолият юритган 52 нафар шахс ушланган.
Дастлабки маълумотларга кўра, гуруҳ Осиё давлатларида оммалашган ноқонуний онлайн қимор ва букмекерлик ўйинлари учун пул маблағларини қабул қилиш, уларни банк карталарига ўтказиш, яъни пул маблағларини легаллаштириш билан шуғулланган.
Хонадондан 110 минг АҚШ доллари миқдорида нақд пул, 75 та ноутбук, 278 та телефон ва 3 та Starlink космик интернет қурилмаси ашёвий далил сифатида олинган.
Тезкор тадбирлар Миробод туманидаги Катта Миробод кўчасида жойлашган яна бир манзилда давом эттирилган. Бу ерда ойига 2 минг АҚШ долларига ижарага олинган хонадонда фаолият юритган иккинчи яширин колл-марказ аниқланган. Унда бўлган 20 нафар шахс ҳам ушланган.
Мазкур гуруҳ интернет орқали сохта иш таклифларини тарқатиш билан боғлиқ фирибгарлик схемасидан фойдаланган. Жумладан, жиноятчилар ўзларини аёл киши сифатида таништириб, интернет фойдаланувчиларини алдаган ва уларнинг пул маблағларини ўзлаштирган.
Ушбу манзилдан 24 та ноутбук, битта планшет, 52 та телефон ва 4 та Wi-Fi қурилмаси ашёвий далил сифатида олинган.
Қайд этилишича, ҳар икки гуруҳда вазифалар ўзаро тақсимланган бўлиб, уларнинг фаолиятини раҳбарлар, иш бошқарувчилар, операторлар ва қўриқчилар таъминлаб келган.
Тезкор тадбирлар давомида мазкур гуруҳлар фаолияти билан боғлиқ 576 минг АҚШ доллари миқдоридаги криптоактивлар айланмаси аниқланган.
Ҳозирда ушбу ҳолатлар юзасидан Миробод тумани Ички ишлар органлари фаолиятини мувофиқлаштириш бошқармаси томонидан Жиноят кодексининг 278⁸-моддаси 2-қисми билан жиноят иши қўзғатилган. Тергов ҳаракатлари давом этмоқда.
Тошкент шаҳар Ички ишлар бош бошқармаси фуқароларни ўз хонадонларини ижарага беришда эҳтиёткор бўлишга, ижарачиларнинг фаолияти билан қизиқишга ва шартномаларни қонуний расмийлаштиришга чақирди.
Ижарага берилаётган жойдан жиноий мақсадларда фойдаланилишига билиб-билмай шароит яратиб бериш қонунчиликда белгиланган жавобгарликка сабаб бўлиши мумкин.
