Бош прокуратура ҳузуридаги Иқтисодий жиноятларга қарши курашиш департаментининг Юнусобод тумани бўлими ходимлари томонидан тадбиркорлик субъектлари ҳуқуқларини ҳимоя қилиш юзасидан тезкор тадбир ўтказилди.

Маълум бўлишича, фуқаро Ш.Р. «C.S.» МЧЖ раҳбари И.К.га қалбаки хизмат гувоҳномасини кўрсатиб, ўзини «Юнусободтумангаз» ходими сифатида таништирган. У корхонанинг умумий овқатланиш шохобчасида аниқланган қонунбузилиш ҳолати учун қўлланилиши мумкин бўлган 5,2 миллион сўм жаримани расмийлаштирмаслик эвазига 3,3 миллион сўм талаб қилган.

Ушбу пулни фирибгарлик йўли билан олган вақтида у ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) ҳамда 228-моддаси (ҳужжатларни қалбакилаштириш ва улардан фойдаланиш) билан жиноят иши қўзғатилган. Ҳозирда тергов ҳаракатлари олиб борилмоқда.