Янги тартибга кўра, стартапни ишлаб чиқиш ва амалиётга жорий этиш харажатларининг 50 фоизи, бироқ 1 млрд сўмдан ошмаган миқдорда субсидия шаклида қоплаб берилади.

Тегишли тартиб Вазирлар Маҳкамасининг 2026 йил 18 августдаги 443-сон қарори билан тасдиқланган Маъмурий регламентда белгиланган. Ҳужжат 19 августдан кучга кирган.

Субсидия Туризм қўмитаси ҳузуридаги бюджетдан ташқари Туризмни қўллаб-қувватлаш жамғармаси маблағлари ҳисобидан ажратилади. Ҳар йили энг яхши 10 тагача лойиҳа молиявий қўллаб-қувватланади. Бир талабгорга субсидия бир календарь йилида бир марта берилади.

Кимлар субсидия олиши мумкин?

Ариза топшириш санасида талабгорнинг солиқ ва йиғимлар бўйича қарздорлиги бўлмаслиги, шунингдек, у банкротлик ёки тугатиш жараёнида бўлмаслиги лозим.

Ариза Давлат хизматлари маркази ёки Ягона интерактив давлат хизматлари портали — my.gov.uz орқали Туризм қўмитасига тақдим этилади.

Унга стартапни амалиётга жорий этиш бўйича бизнес-режа ва лойиҳа тақдимоти илова қилинади. Аризалар ҳар чорак якунининг 20-санасидан 25-санасигача бепул қабул қилинади.

Лойиҳа қандай баҳоланади?

Ариза келиб тушганидан кейин 5 иш куни ичида талабгорга суҳбат ўтказилиши ҳақида хабар берилади. Суҳбат видеоконференция орқали ёки талабгорнинг шахсан иштирокида ўтказилади.

Унда талабгор ўз стартапини комиссияга тақдим этади. Комиссия 10 иш кунида лойиҳанинг белгиланган талабларга мувофиқлигини ўрганиб, субсидия ажратиш мақсадга мувофиқлиги бўйича хулоса беради.

Бунда, хусусан:

  • стартапнинг муайян туризм хизматини ривожлантиришга қаратилгани;
  • хизматнинг бугунги кунда туристлар учун долзарблиги;
  • аввал мавжуд бўлмаган ёки сезиларли даражада такомиллаштирилган ечим таклиф этилаётгани инобатга олинади.

Туризм қўмитаси комиссия хулосаси асосида 2 иш кунида қарор қабул қилади. Ижобий қарор қабул қилинган тақдирда, субсидия маблағлари 7 иш кунида талабгорнинг тижорат банкидаги ҳисобварағига ўтказилади.