Бу ҳақда Ягона интерактив давлат хизматлари портали — my.gov.uz орқали маълум қилинди.
Қайд этилишича, Ўзбекистонда рўйхатдан ўтган тадбиркорлар хорижда миллий ресторан ташкил этиш билан боғлиқ харажатларининг 50 фоизигача бўлган қисмини субсидия шаклида қайтариб олишлари мумкин.
Мазкур давлат хизмати Туризм қўмитаси томонидан my.gov.uz портали орқали бепул кўрсатилади.
Субсидия олиш учун қуйидаги ҳужжатлар талаб этилади:
Рестораннинг хорижда рўйхатдан ўтгани ва бинога бўлган ҳуқуқни тасдиқловчи ҳужжатлар;
Санитария ва ёнғин хавфсизлиги талабларига мувофиқликни тасдиқловчи ҳужжатлар;
Амалга оширилган харажатлар ва Ўзбекистондан маҳсулот етказиб беришга оид ҳужжатлар (заруратга қараб расмий таржимаси билан);
Рестораннинг ички ва ташқи кўриниши акс этган фотосуратлар.
Маълум қилинишича, my.gov.uz орқали юборилган ариза 18 иш куни ичида кўриб чиқилади. Ижобий қарор қабул қилинган тақдирда, субсидия маблағи 7 иш куни ичида тадбиркорнинг банк ҳисобварағига ўтказиб берилади.
Агар аризада камчиликлар аниқланса, уларни бартараф этиб, қайта мурожаат қилиш имконияти мавжуд.
Тадбиркорлар субсидия олиш учун my.gov.uz порталидаги тегишли давлат хизмати орқали ариза топширишлари мумкин.
