Янги низомга кўра, субсидиялар Иқтисодиёт ва молия вазирлиги томонидан қайта молиялаштириладиган ипотека кредитлари доирасида бирламчи уй-жой бозоридан квартира сотиб олиш учун ажратилади.
Бунда субсидия ариза берувчининг асосий иш жойи жойлашган ҳудудда қурилган квартира учун йўналтирилади.
Субсидия олиш истагидаги фуқаролар Давлат хизматлари марказлари ёки Ягона интерактив давлат хизматлари портали (my.gov.uz) орқали мурожаат қилиши мумкин.
Ариза берувчининг белгиланган талабларга мувофиқлиги ахборот тизимлари орқали автоматик тарзда текширилади. Жумладан:
ариза берувчи ва унинг турмуш ўртоғи умумий даромадининг белгиланган мезонларга мувофиқлиги;
ариза берувчи ва унинг турмуш ўртоғи номида республика ҳудудида сўнгги икки йил давомида мулк ҳуқуқи асосида турар жой мавжуд бўлмагани;
ариза берувчининг маданият, санъат ва адабиёт соҳаларида камида уч йиллик иш стажига эгалиги;
ариза берувчининг мазкур соҳаларда фаолият юритиши учун сўнгги уч йилда лицензияга эга бўлгани ва бошқа мезонлар.
Субсидия бир оилага фақат бир марта ажратилади.
Субсидия ажратиш тўғрисида хабарнома олган талабгор бирламчи уй-жой бозоридан квартира сотиб олиш учун қурилиш ташкилоти ёки девелопер билан шартнома тузади.
Шунингдек, бошланғич бадалнинг бир қисмини қоплаш учун ажратилган субсидия маблағидан у ўтказилган кундан бошлаб 30 кун ичида фойдаланилмаса, банк ушбу маблағни Ўзбекистон Республикасининг республика бюджетига қайтаради.
