Адлия вазирлиги мазкур ҳолатга тушунтириш берди. Аслида эса янги тартиб қурувчи ва харидор ўртасидаги бевосита бўлиб-бўлиб тўлаш асосидаги савдони тақиқламайди, дейилади "Ҳуқуқий ахборот" каналида.
Президентнинг 2026 йил 14 августдаги ПҚ–294-сон қарори билан 2027 йил 1 январдан муддатли тўлов хизмати операторлари фаолияти тартибга солинади.
Оператор ким? Муддатли тўлов хизматини кўрсатувчи юридик шахслар муддатли тўлов операторлари ҳисобланади.
Қарорнинг 3-банди “д” кичик бандига кўра, кўчмас мулк оператор кўрсатадиган муддатли тўлов хизматининг объекти бўла олмайди. Яъни воситачи-оператор сизга уйни “рассрочка”га олиб бера олмайди.
Аммо бу қурувчи ўзи қурган уйни харидорга бевосита бўлиб-бўлиб тўлаш шарти билан сота олмайди, дегани эмас.
Чунки қарорнинг 3-банди “а” кичик бандида сотувчи томонидан истеъмолчига тўғридан-тўғри сотиш ҳолатлари муддатли тўлов хизмати тушунчасидан мустасно қилинган.
Демак, сиз аввалгидек қурувчининг ўзидан уй-жойни “рассрочка”га олишингиз мумкин. Қарор қурувчи ва харидор ўртасидаги бевосита савдони тақиқламайди.
Эндиликда операторлар махсус реестрга киритилади, Марказий банк назоратида ишлайди, уларнинг шартномалари, устама ва комиссияларига аниқ талаблар белгиланади.
