Маълум бўлишича, ҳолат Юнусобод тумани 4-даҳа, 58-кўп квартирали уйда ўтказилган ўрганиш ишлари давомида аниқланган. Текширув натижасида хонадон мулкдори томонидан бинонинг таянч конструкцияси рухсатсиз олиб ташлангани маълум бўлган.

Мутахассисларнинг таъкидлашича, кўп қаватли биноларда конструкциялар ўзаро узвий боғланган бўлиб, улар бинонинг мустаҳкамлиги ва сейсмик барқарорлигини таъминлайди. Шу сабабли таянч қисмларга ўзбошимчалик билан аралашиш нафақат битта хонадон, балки бутун уй аҳолиси хавфсизлигига таҳдид солиши мумкин.

Ҳолат юзасидан мулкдор шундай изоҳ берган: «Бузаётганда билмаганман, мен ўзим бу ерда бўлмаганман. Келгунимча бузиб бўлишибди. Келиб кўрдим, кейин тўхтатдим».

Мазкур ҳолат бўйича Ўзбекистон Республикаси Маъмурий жавобгарлик тўғрисидаги кодексининг 159-моддаси учинчи қисми билан маъмурий баённома расмийлаштирилди. Шунингдек, ўзбошимчалик билан бузиб ташланган конструкцияни қайта тиклаш юзасидан мажбурий кўрсатма берилди.

Мутахассислар кўп қаватли уйларда реконструкция ёки қайта режалаштириш ишларини бошлашдан олдин тегишли рухсат олиш ва мутахассислар хулосасига амал қилиш зарурлигини эслатмоқда. Чунки хонадондаги ноқонуний ўзгаришлар бутун бино хавфсизлигига таъсир кўрсатиши мумкин.