Қарорга мувофиқ, 2030 йилга қадар велосипед спорт турларини оммалаштириш ва ривожлантириш бўйича бир қатор мақсадлар белгиланди.

Жумладан:

  • мамлакатда велоспорт билан мунтазам шуғулланувчи аҳоли сонини 30 минг нафарга етказиш;
  • Осиё миқёсидаги мусобақаларда миллий терма жамоанинг энг юқори натижалар бўйича кучли учликка киришини таъминлаш;
  • Олимпия ўйинларида велоспорт бўйича қўлга киритиладиган лицензиялар сонини ошириш ва медаллар учун курашиш.

2027 йил март ойидан бошлаб аҳолини велоспорт орқали соғлом турмуш тарзига кенг жалб қилиш ва мазкур спорт турининг оммавийлигини ошириш мақсадида қатор мусобақалар анъанавий тарзда ўтказиб борилади.

Хусусан:

  • олий таълим ташкилотлари талабалари ўртасида — «Талабалар кубоги»;
  • зарур инфратузилмага эга умумий ўрта таълим муассасаларининг юқори синф ўқувчилари ўртасида — «Директор кубоги»;
  • ногиронлиги бўлган шахслар ўртасида — «Сенинг имкониятинг» паравелоспорт мусобақаси;
  • тегишли вазирлик ва идоралар ходимлари ўртасида — «Янги Ўзбекистон» велоспорт мусобақаси;
  • 8 март — Хотин-қизлар куни муносабати билан аёллар ўртасида — «Баҳор маликалари» веломарафони;
  • 22 сентябрь — «Автомобилсиз кун» акцияси доирасида аҳоли ўртасида — «Саломатлик сари йўл» веломарафони ташкил этилади.

Шунингдек, «Янги Ўзбекистон Олимпия чўққилари» мусобақалари доирасида ҳам велоспорт бўйича беллашувлар ўтказиб борилади.

Қарор билан Республика велоспорт маҳорат мактаб-интернати фаолияти иқтидорли спортчиларни тайёрлаш ва уларни терма жамоаларга етказиб беришга йўналтирилади.

2027/2028 ўқув йилидан бошлаб мактаб-интернатда паравелоспорт йўналишида таҳсил оладиган ўқувчилар улуши умумий контингентнинг 20 фоизига етказилади.

Бунда мактаб-интернатнинг умумий контингенти 6–11-синфларда таҳсил оладиган 100 нафар ўқувчи-спортчи миқдорида сақлаб қолинади.

2027/2028 ўқув йилига қадар Республика велоспорт маҳорат мактаб-интернати Ўзбекистон велосипед спорти федерацияси билан ҳамкорликда умумтаълим мактаблари ўқувчилари фойдаланиши учун видео-маҳсулотлар яратади.

Бундан ташқари, Тошкент шаҳрида 2027 йил март ойидан бошлаб «Тошкент тажрибаси» жорий этилади. Унга кўра, маҳаллий бюджет маблағлари ҳисобидан 2027–2028 йилларда зарур инфратузилмага эга умумтаълим мактаблари босқичма-босқич велосипедлар билан таъминланади ҳамда тренерлар билан ҳамкорлик йўлга қўйилади.