Мамлакатнинг ранг-баранг географияси ва табиати нуфузли ультрамарафонлар учун ҳам қулай имконият яратади.
Бу йўналиш 2026 йилда тобора оммалашаётган саёҳат тенденцияларига ҳам ҳамоҳанг. Бугун сайёҳлар сафарни шунчаки янги жойларни кўриш эмас, балки табиат қўйнида фаол бўлиш ва спорт тадбирларида қатнашиш имконияти сифатида ҳам кўрмоқда. Шу боис треккинг ва фаол туризмга қизиқиш тобора ортиб бормоқда.
Туркиянинг турли ҳудудларида ўтказилаётган ультрамарафонлар мамлакат табиатини янгича кашф этиш имконини беради. Улар орасида Рунфире Салт Лаке Ультра Траил энг ноодатий пойгалардан бири сифатида ажралиб туради. Туркия туризмни тарғиб қилиш ва ривожлантириш агентлиги (ТГА) кўмагида ташкил этиладиган ушбу мусобақа жорий йилнинг 21–23-август кунлари Аксарайнинг Эскил ҳудудидаги Туз кўлида бўлиб ўтади. Бу йилги пойгада 13 мамлакатдан 750 нафар спортчи иштирок этади.
Туз кўлининг бепоён кенгликлари бўйлаб унутилмас пойга
Рунфире Салт Лаке Ультра Траил турли тайёргарлик даражасидаги спортчилар учун етти йўналишни таклиф этади. Мусобақа 10 км, 10 км жамоавий, 15 км кундузги ва тунги, 20 км, 40 км, 80 км ҳамда 100 мил (160 км) масофаларни ўз ичига олади. Шу тариқа Рунфире қисқа масофага югурувчилардан тажрибали ультрамарафончиларгача бўлган спортчиларни бир майдонда жамлайди.
Пойга тарихи 2012 йилда илк бор ўтказилган Рунфире Kаппадокиа мусобақасининг энг мураккаб босқичидан бошланган. У Ликия йўли ультрамарафонидан кейин Туркияда ташкил этилган иккинчи кўп босқичли пойга эди. 2016 йилдан бошлаб эса Туз кўлидаги ушбу йўналиш мустақил, бир босқичли ультрамарафон сифатида ўтказиб келинмоқда.
Туз кўлининг чексиз оқ кенгликлари, жонли лагер муҳити, саҳна чиқишлари, мусиқа ва турли тадбирлар пойгани спорт ва табиат уйғунлашган ёрқин тажрибага айлантиради.
Туз кўлининг ноёб табиати
Туз кўли Марказий Онадўлида, Анқара, Аксарай ва Коня оралиғида жойлашган бўлиб, мамлакатнинг иккинчи йирик кўли ҳисобланади. У кенг ҳудудни эгаллашига қарамай, ниҳоятда саёз, ўртача чуқурлиги 50 сантиметрдан кам, энг чуқур жойи эса қарийб бир метрга етади. Ёзда сувнинг буғланиши натижасида кўл чекиниб, айрим жойларда қалинлиги 30 сантиметргача етадиган оппоқ туз қатлами юзага чиқади.
Туз кўли нафақат бепоён кенгликлари ва ҳайратланарли манзаралари, балки бой табиий дунёси билан ҳам алоҳида аҳамиятга эга. Махсус экологик муҳофаза ҳудуди мақомига эга кўл кўчиб юрувчи ва шу ерда кўпаядиган сув қушлари учун муҳим яшаш масканидир. Шунингдек, у Туркиядаги энг йирик фламинго кўпаядиган ҳудудлардан бири бўлиб, ҳар йили минглаб фламинголар бу ерда уя қуради. Туз кўлининг ноёб табиий ва экологик қиймати эътироф этилиб, унинг Махсус экологик муҳофаза ҳудуди ЮНЕСКОнинг Бутунжаҳон мероси дастлабки рўйхатига киритилган.
Ана шундай нозик экотизимда ўтказиладиган Рунфире Салт Лаке Ультра Траил мусобақасида табиатга масъулиятли муносабат асосий тамойиллардан бири ҳисобланади. Ташкилотчилар пойгани ўтказишда Туз кўлининг ноёб экотизимини асрашга алоҳида эътибор қаратади.
