“Янги Ўзбекистон” газетасида “Янгиланишлар харитаси” лойиҳасини бошлаган эдик. Унда мамлакатимиздаги ислоҳотларнинг ҳудудларда қай йўсин амалга ошаётгани, оддий одамлар ҳаётидаги янгиланишлар, олис қишлоқ ва овулларда яшайдиган юртдошларимиз ўй-фикрлари, орзулари каби масалаларга жавоб топиш учун газетамизнинг Қорақалпоғистон Республикаси ва вилоятлардаги мухбирлари билан онлайн гурунг ташкил этиб боришни мақсад қилганмиз.

Бу сафарги суҳбатимиз “Янги Ўзбекистон” массивлари ҳақида бўлди. Унда янги массивлар оддий инсонлар турмуш ­тарзида қандай ўзгариш ясаганини очиб беришга уриндик. Суҳбат чоғида мавзунинг кўлами кенглиги, бу борада айтиладиган фикрлар кўплигини сездик. Шу боис, энг муҳим деб ҳисобланган фактлар асосидаги фикрларга кўпроқ эътибор бердик. Умид қиламизки, пойтахтдан олисда, оддий одамлар орасида юрган журналистлар нигоҳи ила мамлакат бўйлаб қулоч ёзган янгиланишлар харитасини кўриш, тасаввур этиш йўлидаги навбатдаги суҳбатимиз сиз, азиз ўқувчиларга манзур бўлади.

Таҳририят

Ғолиб АБДУСАЛОМОВ:

— Мамлакатимиз ҳаётида сўнгги 10 йил улкан бунёдкорлик даври сифатида тарихга муҳрланяпти. Ушбу янгиланишлар шиддати олису яқин манзилларда бирдек кўзга ташланмоқда. Хусусан, Навоий вилоятида ҳам ўтган қисқа даврда шаҳару қишлоқлар, чекка овул ва қўрғонларда катта ҳажмдаги қурилиш, бунёдкорлик ишлари бажарилди. Маҳаллалар обод бўлди.

“Янги Ўзбекистон” массивларини барпо этиш дастури ана шу бунёдкорлик ишларига янгича руҳ берди. Шунчаки руҳ берди дейиш камлик қилади. Дастур халқимизнинг уй-жойга эҳтиёжи қатори яна бир қанча ижтимоий-иқтисодий масалаларга ечим бўлди. Тараққиёт шиддатини ўзида жамлаган йирик лойиҳа сифатида ҳаётимизга кириб келди.

Шу ўринда бир жиҳатни эсга олсак. Дастлаб қишлоқ жойларда, очиқ далаларда кўп қаватли уйлар қурила бошлаганида айрим юртдошларимиз бунга бир оз ажабланиш билан қараган эди. Шунча кенг жойда кўп қаватли уйлар қуриш нимага керак деган саволлар қулоққа чалингани бор гап. Негаки кўп қаватли уйни қишда иситиш, ёзда салқин сақлаш билан боғлиқ масалалар кўпчиликни ўйлантирарди. Шу пайтгача айрим шаҳарчаларда ҳам оқова сув тизими йўқлиги бунга сабаб эди.

“Янги Ўзбекистон” массивлари қарашларимизни буткул ўзгартирди. Чекка, қаровсиз ётган ерлардан ҳам оқилона фойдаланиш, замонавий шаҳар бунёд этиш мумкинлигини исботлади. Хусусан, Навоий вилояти марказидан қарийб 200 километр узоқдаги Зарафшон шаҳрида катта бунёдкорлик ва ободонлаштириш ишлари бажарилди. Йўллар равон бўлиб, чироқлар ўрнатилди. Йўл четларига манзарали гул ва дарахт кўчатлари экилди. Зарафшон шаҳри ташкил этилганида 50 минг аҳоли яшаши мўлжалланган. Сўнгги 20 йилда шаҳарда аҳоли сони қарийб 2 баравар кўпайди. Ўз-ўзидан уйлар ва инфратузилма объектлари қуввати ошиши талабга айланди. Содда айтганда, битта хонадонда бир неча оила тиқилиб яшарди. Поликлиникага борган киши узоқ навбатда туришга, қониқарли бўлмаган шароитда даволанишга мажбур эди. Негаки талаб ошгани сари моддий-техник база сабаб хизмат сифатига таъсир қиладиган омиллар кўпайиб бораётганди.

Мамлакатимиз етакчисининг Навоий вилоятига ташрифи чоғида ҳудуд фаолларининг Зарафшон шаҳрини кенгайтириш ва шаҳар марказий поликлиникаси учун янги бино қуриш таклифи маъқулланди. Ўтган қисқа муддат ичида шаҳарда 7-12 қаватли турар жой бинолари қад ростлади. Ҳозир саноатчилар шаҳри кун сайин кенгайиб бормоқда. Шаҳардаги “Янги Ўзбекистон” массивида 2024 йилда 100 га яқин кўп қаватли турар жой қурилган эди. Улар 2025 йилда 180 тага етказилди. Жорий йилда ҳам қурилиш давом этяпти.

Яна бир мисол. Кармана туманининг Дўстлик маҳалласида 21 гектарда “Янги Ўзбекистон” массиви барпо этилди. Унинг биринчи босқичи — 2022-2024 йилларда 420 хонадонли 18 та кўп қаватли уй қад ростлади. Ўтган 2025 йилда 40 хонадонли яна 2 та уй фойдаланишга топширилди. Юртдошларимизда ушбу массивлардан хонадон сотиб олишга иштиёқ баланд. Негаки улар бошқа уйлардан тубдан фарқ қилади. “Янги Ўзбекистон” массивларини шаҳар ичидаги алоҳида кичик шаҳарча десак, тўғри бўлади. Яъни аҳолига яшаши учун нима керак бўлса, қандай хизматга зарурат бўлса, массивларнинг ўзида яратиляпти. Бу хусусда ҳамкасбларимиз ҳам фикрини батафсил айтади. Демоқчимизки, “Янги Ўзбекистон” массиви тимсолида инсонга эътибор, уни қадрлашнинг амалий ифодасини кўриш мумкин.

Ушбу массивларнинг ўзига хослиги лойиҳада кўп қаватли уйлар ёнига мактаб, боғча, поликлиника, савдо нуқталари комплекс тартибда қурилганида. Шунга асосан, тумандаги янги массивда ҳам мактабгача таълим ташкилоти, мактаб ва поликлиника қурилиб, фойдаланишга топширилди.

— Бош режага кўра, туманимиздаги “Янги Ўзбекистон” массивида 1180 хонадонли 56 та кўп қаватли уй қуриш режа қилинган, — дейди Кармана тумани ҳокими ўринбосари Анвар Тошназаров. — Шунингдек, 1 та 330 ўринли, 1 та 660 ўринли умумий ўрта таълим мактаби, 180 ўринли 2 та мактабгача таълим ташкилоти, маҳалла биноси, маданият уйи, савдо ва маиший хизмат кўрсатиш мажмуаси, автомобиллар учун тураргоҳ, болалар ва спорт майдончалари, истироҳат боғи, умумий овқатланиш ҳамда бошқа кўнгил­очар шохобчалар қурилиши кўзда тутилган. Янги массивда бинолар ­белгиланган стандартлар асосида, шаҳарсозлик нормаларига амал қилинган ҳолда мустаҳкам ва сифатли қилиб қурилиши тегишли ташкилотлар назоратига олинган. 2022-2025 йиллар давомида қурилиши якунланган кўп қаватли уйлар ва бинолар иситиш тизимига уланган, газ, сув, электр билан таъминланган ва янги хонадонлар аҳолига замонавий дизайнда, тўла-тўкис таъмирланган ҳолатда топширилди.

Қизилтепа туманининг Маликобод маҳалласида ҳам “Янги Ўзбекистон” массиви бун­ёд этиляпти. Унда 52 та кўп қаватли уй, мактаб, боғча, оилавий поликлиника, савдо ва маиший хизмат кўрсатиш объектлари, истироҳат боғлари бўлади. Ичимлик сув, электр, табиий газ, иссиқлик ва канализация тармоқлари тортилиб, ички йўллар таъмирланяпти.

Қизилтепа тумани ҳокими ўринбосари Ҳасан Алиевнинг маълум қилишича, массив учун 20,1 гектар ер ажратилган. Лойиҳанинг 1-босқичида 200 хонадонли 8 та 5 қаватли уй қурилиб, фойдаланишга топширилган. Шунингдек, 180 ўринли умумий ўрта таълим мактаби, 50 қатновли тиббиёт муассасаси қурилди. Бу ишлар қисқа вақт — 2022-2024 йиллар давомида бажарилди. Айни вақтда 2-босқич ишлари давом этмоқда. Унинг доирасида 252 та хонадонли 7 та 9 қаватли уй қад ростлаяпти. Бош режага кўра, 1112 хонадонли 50 та кўп қаватли уй, мактаблар, маҳалла биноси, маданият уйи, савдо ва маиший хизмат кўрсатиш мажмуаси, автотураргоҳ, болалар ва спорт майдончаси қурилади. 

“Янги Ўзбекистон” массивлари олис ҳудудларга илгари шаҳарларимизда ҳам бўлмаган замонавий ҳаёт тарзини олиб кирди. Шахсан мен шу пайтгача Тошкентда ёки дунёнинг бошқа шаҳарларида ҳам барча имконият, хизматлар бир жойда жамланган ихчам, замонавий, барча талабларга жавоб берадиган шаҳарча бунёд этилганини эшитмаганман. Тўғри, бу борада изланиб муайян ўхшашликларни топдим. Масалан, Сингапур каби ривожланган давлатларда шунга яқин лойиҳалар бор. Уларда хизмат кўрсатиш тизими бир жойда, ёпиқ бино ичида жойлашган. Массив ичида иш ўринлари яратилган бинолар эса фақат ётоқхона шаклида қурилган.

“Янги Ўзбекистон” массивлари том маънодаги шаҳарча. Унинг иш ўрни ҳам, хизмат кўрсатиш соҳаси ҳам, маданий ҳордиқ чиқаришга сайилгоҳ ва чойхоналари ҳам бор. Хавфсизлик тизими, аҳолини қийнайдиган саволларга жавоб шу маҳалланинг ўзида жамланган.

Акбар РАҲМОНОВ:

— Тўғри айтдингиз, Ғолиб ака! Бугун олис ҳудудлар обод масканга айланяпти. Уч-тўрт ой олдин борган манзилга яна йўлингиз тушса, ўзгаришлардан ҳайратланасиз. Узоқ йиллар қаровсиз ётган жойлар қисқа фурсатда гўзал маскан бўлиб боряпти.

Ушбу йирик лойиҳа аниқ ҳуқуқий асос, иқтисодий ечимлар билан амалга оширилмоқда. Хусусан, 2021 йил 9 декабрда давлатимиз раҳбари “Янги Ўзбекистон” массивларини қуриш ва ҳудудларнинг ижтимоий-иқтисодий ривожланишини таъминлаш чора-тадбирлари тўғрисида”ги фармонни имзолаган эди. Мазкур ҳужжатга кўра, 2022 йилдан манзилли рўйхат асосида жойларда “Янги Ўзбекистон” массивлари қурилиши бошланди.

Қашқадарёда дастлаб Косон ва Яккабоғ туманларида замонавий уйлар қурилишига киришилган эди. Белгиланган муддатда сифатли, талаб даражасида барпо этилган иморатлар бугун аҳолига хизмат кўрсатмоқда.

Яккабоғ тумани ҳокимлиги берган маълумотга кўра, “Янги Ўзбекистон” массиви учун ажратилган 18 гектар ерда жами 1340 хонадонли 54 та 5 қаватли уй қурилиб, фойдаланишга топширилган. Лойиҳа доирасида 36 хонадонли 15 та, 40 хонадонли 1 та, 20 хонадонли 38 та уй-жой барпо этилган. Шунингдек, бюджет маблағлари эвазига 15 миллиард сўмга 330 ўринли 1 та янги мактаб ҳамда 6,5 миллиард сўмга 120 ўринли 1 та мактабгача таълим ташкилоти ва 1,7 миллиард сўмга маҳалла биноси қурилган.

Бу битта ҳудуддаги зарур иншоотлар учун сарфланган маблағ. Энди қуйидаги фактларга эътибор қилинг. Икки йўлакли кўп қаватли ўн бешта уйнинг 1-қаватидан тадбиркорлар учун 3750 квадрат метр жой ажратилган. Уларда тадбиркорларнинг 43 миллиард сўм маблағи ҳисобидан 45 дан ортиқ янги тадбиркорлик субъекти ташкил этилган. Натижада 120 та янги иш ўрни яратилган.

Биз бундай рақамларни осонгина айтиб кетаверамиз. Аммо уларнинг ҳар бири ортида жуда катта меҳнат, ишонч, рағбат ва интилиш бор. Масалан, ҳозир дунёда геосиёсий ва геоиқтисодий жараён жуда мураккаб. Бундай вазиятда ҳар бир мамлакат ички имкониятидан келиб чиқиб, иқтисодий барқарорликни  сақлаш чораларини кўради. Демоқчимизки, битта массив учун мана шундай йирик миқдорда сармоя ажратиш осон эмас.

Тадбиркорлар янги биноларнинг биринчи қаватига миллиардлаб пулини сармоя қилиши ҳам бежиз эмас. Чунки шу маблағ ортиғи билан қайтиб келишига ишонади. Негаки уйлар харидоргир. Халқимиз уйларни тўлдириб яшай бошлаши ҳамон тадбиркорлар даромади кўпаяверади. Бир томонда эса ишбилармонларга катта имтиёз ва имкониятлар берилмоқда. Бу уларни ишини янада кенгайтириш, янги иш ўринлари яратишга рағбатлантирмоқда.

“Янги Ўзбекистон” массивларидаги уйлар нега харидоргир? Сабаб оддий, у ерда барча шароит бор! Масалан, Яккабоғ туманидаги массивда 3,1 километр ичимлик сув тармоғи учун 2 та сув иншооти ҳамда 8,4 километр оқова сув тармоғи учун 1 та иншоот ва 6 километр ички йўл қурилган. Тағин 3,8 километр иссиқлик тармоғи тортилиб, қозонхона барпо этилган. Табиий газ учун 1,5 километр қувур тортилиб, 6 та тақсимлаш пункти, 50 кВт қуёш панеллари ва 140 минг литр сиғимга эга 700 дона гелиоколлектор ўрнатилди. Бундай ишларни яна узоқ санаш мумкин.

Мана шу рақамларнинг ўзини бир жойда жамлаб қарасангиз, улкан бунёдкорликни ҳис этасиз. Замонавий шаҳар кўринишига келган бу манзил бир пайтлар қаровсиз майдон бўлганига ишонмайсиз. Яна бир гап. Мазкур массивда бошқа туман ва шаҳарлардагидан фарқли ўлароқ, етакчи тадбиркор ташаббуси билан йирик лойиҳа асосида экобозор ташкил этилган. Қиймати 6 миллион доллардан ортиқ бўлган ушбу мажмуа уч қаватдан иборат бўлиб, 80 та иш ўрни яратилган. Муҳими, бозорда озиқ-овқат маҳсулотлари ҳам, ­кийим-кечаклар ҳам, дам олиш ва овқатланиш нуқталари ҳам бор.

Сарвар ТЎРАЕВ:

— Сурхондарё вилоятининг Ангор, Бойсун, Жарқўрғон, Сариосиё ва Термиз туманларида “Янги Ўзбекистон” массивлари ­бунёд этилган. Ушбу уйлардаги янги хонадон ­калитини қабул қилиб олаётган ҳар бир юртдошимиз инсон қадрини улуғлаш йўлидаги ислоҳотлардан мамнун.

Юқорида ҳамкасбларимиз тўғри айтди: массивлардаги кенглик, муҳташамлик, ободлик ва саранжом-саришталикдан дилингиз яйрайди. Ҳар бир бино-иншоотда халқимизга хос яратувчанлик ва бунёдкорлик салоҳияти тўлиқ намоён бўлаётгандек гўё. Сариосиё, Бойсун, Жарқўрғон, Ангор ва Термиз ­туманларидаги “Янги Ўзбекистон” массивларида қад ростлаётган 5 ва 9 қаватли уйлар икки ва уч хонадан иборат, замонавий ҳамда шинам. Бу бинолар 9 балли зилзилага чидамли қилиб қурилган.

Ҳар бир хонадонда алоҳида иссиқлик ва сув иситиш тизими ўрнатилган. Бу хона ҳароратини мустақил бошқариш, энергия сарфини 2 баробаргача қисқартириш имконини беради. “Янги Ўзбекистон” массивларини бунёд этиш борасидаги қарор ва фармонлар қоғоздагина эмас, балки ҳаётда, кундалик турмуш тарзида аксини топаётгани инсонларда эртанги кунга ишончни, юртга муҳаббат ва ислоҳотларга иштиёқни янада мустаҳкамлаяпти. Массивлардаги хонадонларда яратилган ҳар бир қулайлик, ҳар бир инновацион ёндашув халқнинг яшаш сифати ошишига, оилавий осойишталик ва ижтимоий барқарорликка хизмат қилмоқда.

“Янги Ўзбекистон” массиви ва унинг атрофидаги объектлар режасини тузишда истиқболда аҳоли ўсиши, ҳудуд инфратузилмаси ва ишлаб чиқариш кенгайиши каби жиҳатлар ҳам назарда тутилган. Бу жуда муҳим омил. Шу билан бирга, массивларга ёндош ҳудудларда фойдаланишдан чиққан ер майдонларини қайта ўзлаштириш ҳисобига иссиқхоналар қуриш, савдо ва хизмат кўрсатиш нуқталари бунёд этиш орқали янги иш ўринлари яратилмоқда.

Хусусан, Жарқўрғондаги “Янги Ўзбекистон” массивида ҳозирга қадар 7 та микромарказ, 29 та савдо ва маиший хизмат кўрсатиш шохобчаси қурилиб, фойдаланишга топширилди. Бундан ташқари, массив ҳудудида 50 қатновли оилавий поликлиника, 180 ўринли болалар боғчаси, 330 ўринга эга мактаб ва АТ марказ қурилган. Инфратузилма объектларини қуриш ва ободонлаштириш шу билан якун топгани йўқ. Массивга 1,9 километр ичимлик сув, 3,9 километр оқова сув, 2,3 километр иссиқлик тармоқлари, 2,8 километр газ қувури тортилди. 5 та трансформатор ўрнатилди. Пиёдалар йўлакчалари қурилиб, 4,5 гектар ерга манзарали ва мевали дарахтлар ҳамда 300 гектар дашт ҳудудига саксовул экилди.

Жарқўрғон туманида қурилиши 2022 йилда бошланган “Янги Ўзбекистон” массивида шу йил охирига қадар жами 86 та кўп қаватли уй фойдаланишга топширилиши белгиланган.

Сурхон воҳасининг табиий-иқлим шароитидан келиб чиқиб, жойларда бунёд этилаётган массивларда яшил белбоғлар, боғ яратиш, уйлар атрофида турли мевали ва манзарали дарахт кўчатлари экиш, уларни суғориш тизимига алоҳида эътибор ­бериляпти. Очиғи, бугун бу ерга келган киши одамлари самимий, атрофи яшилликка ­бурканган, ­инфратузилмаси ривожланган кичик шаҳарчага тушиб қолгандек сезади ўзини. Массив ҳудуди яқин вақтларгача бийдай чўл эди. Шу ердан ўтиб-қайтаётганлар чўлда ҳам кўп қаватли уй бўладими, ёзнинг иссиғида, қишнинг қора совуғида қандай яшаш мумкин деган саволлар берарди. Яшил белбоғ ана шу масалага табиий ечим бўлди. Сув, газ, электр олиб келинди. Мана шу омилларнинг ўзиёқ массивлар узоқ келажакни ўйлаб, пухта режа билан қурилаётганини англатади.

Бугун Сурхондарёда қурилаётган “Янги Ўзбекистон” массивлари мисолидаги бун­ёдкорлик ишлари нафақат архитектурада, балки инсон қалбида ҳам янги нафас, янги руҳ, янги орзу-умидларни уйғотаётгани шубҳасиз. Зеро, фаровон ҳаёт халқ розилигидан бошланади.

Сариосиё туманининг Лутфикор маҳалласида 31 гектардан ортиқ майдонда ҳам “Янги Ўзбекистон” массиви бунёд этиляпти. Бу ерда 2026 йил охиригача 5, 7, 9 қаватли, жами 2322 хонадонга эга 78 та кўп қаватли уй фойдаланишга топширилади. Аҳоли анча зич яшайдиган ҳудудлар учун бундай массивлар муҳим ижтимоий аҳамиятга эга. Уй-жойларнинг сифати ва таннархи ҳам халқнинг имкониятига мос экани эътиборга молик.

Ангор туманидаги Шарқ гули маҳалласида 11,2 гектарда 1005 хонадонли жами 43 та уй қурилиши режа қилинган. Бу ерда ҳам энергия тежамкор материаллар ишлатиляпти, экоҳудудлар яратишга, электр, сув, газ ва йўл тармоқларини тортишдаги янги стандартларга жиддий эътибор берилган. Шу маънода, янги массивларни энергия тежамкорлик жиҳатдан ҳам намуна қилиб кўрсатиш мумкин.

Минажатдин ҚУТЛИМУРАТОВ:

— Инсоннинг бахти, аввало, тинч ва осойишта, фаровон хонадондан бошланади. Шу боис, халқимиз уйни ватан ичидаги ватан дея қадрлайди. Юртнинг ободлиги эса дилни равшан қилади. Қорақалпоғистон Республикаси Қонликўл туманидаги “Янги Ўзбекистон” массиви шундай эзгу мақсадлар маҳсулидир. Мазкур массивда истиқомат қилаётган Нигора Зойирова ҳаётидан рози эканини бот-бот такрорлайди. Замонавий, барча қулайликларга эга хонадонда фарзандлари билан бахтли умр кечирмоқда.

— Янги уйга кўчиб келганимиздан буён ҳаётимиз бутунлай ўзгарди, — дейди Нигора Зойирова. — Хонадонимиз кенг ва ёруғ. Электр, табиий газ, ичимлик сув каби барча қулайликлар муҳайё. Атроф обод, кўчалар кенг ва равон. Фарзандларимиз хавфсиз муҳитда ўйнаб, таълим-тарбия олмоқда. Бундай эътибор ва ғамхўрлик учун миннатдор бўлмаслик мумкин эмас!

Қонликўл туманига кириб келишингиз билан кўп қаватли уйлар кўзга ташланади. Илгари туманда бундай уйлар бўлмаган. Катта магистрал йўлнинг бўйида иқтисодий ва ижтимоий инфратузилмага эга 11 та 5 қаватли уй қад ростлаган. Қулай шароитларга эга уйларда 330 хонадон бор. Бу битта тумандаги ана шунча оиланинг қувончи, бахтли ҳаёт тарзининг бир кўриниши.

— Қўнғирот туманидан ушбу кўп қаватли уйларнинг бирига оиламиз билан кўчиб ўтдик. Иш жойим Қонликўл туманида. Имтиёзли кредит ҳисобидан 3 хонали уйни 20 йилга сотиб олдик, — дейди “Янги Ўзбекистон” массивида истиқомат қилувчи Фурқат Раҳимбердиев. — Ёш оилалар учун жуда қулай. Иссиқ ва совуқ сув бор. Қўшнилар ҳам ёш оилалар. Бир-биримиз билан кирди-чиқди қиламиз. Муҳими, мактаб, боғча ёнимизда.

Қонликўл тумани Наврўз маҳалласидаги “Янги Ўзбекистон” массивида 12 миллиард 830 миллион сўм эвазига 3 қаватли, 330 ўринга эга янги мактаб қурилган. У энг замонавий асбоб-ускуналар билан жиҳозлаган. Яшил қопламали стадион, спорт зали, ошхона, чиройли синфлар ушбу массивда истиқомат қилувчи аҳоли болаларига хизмат қилмоқда. Мактаб 2024-2025 ўқув йилида фойдаланишга топширилган. Шунингдек, мактабнинг ёнгинасида 7,7 миллиард сўмга қурилган, 180 ўринга мўлжалланган боғча ҳам фаолият кўрсатмоқда. Янги массивларнинг муҳим жиҳатларидан бири ҳудудда алоҳида таълим масканлари барпо этилаётганидир.

— Қонликўл туманидаги 25-умумтаълим мактабига Ҳиндистондан келиб дарс ўтяпмиз, — дейди хорижлик мутахассис Саини Аканша хоним. — Турмуш ўртоғим Амир Али билан “Янги Ўзбекистон” массивидаги кўп қаватли уйларнинг бирида яшаяпмиз. Хоналари тоза, барча қулайликлар мавжуд. Асосийси, мактабнинг ёнгинасида.

Массив ёнида йирик корхоналардан бири — “Kanteks invest” масъулияти чекланган жамияти жойлашган. Ип-калава ишлаб чиқарувчи ушбу корхона 2019 йил ишга туширилган бўлиб, йилига 9 минг тонна маҳсулот тайёрлайди. Корхонада 600 га яқин маҳаллий аҳоли иш билан таъминланган. Германия, Туркия ва Ҳиндистондан олиб келинган асбоб-ускуналар ўрнатилган корхона тўлиқ қувватда ишламоқда. Жамоанинг аксариятини ёшлар ташкил этади.

Қонликўл тумани илгари ижтимоий-иқтисодий ҳолати оғир туманлардан бири эди. Ўзбекистондаги янгиланишлар сабаб у бугун бутунлай ўзгарди. Корхоналар иш бошлаб, туманнинг тадбиркорлар синфи шаклланиб боряпти. Бу иқтисодиёт билан бирга ижтимоий муҳит ҳам яхшиланишига хизмат қилмоқда. Бир пайтлар Қонликўлда туғилган ёшлар шаҳарларга кўчиб кетиш орзусида яшарди. Энди улар ўз уйи олдидаги мактабда хорижлик мутахассислардан дарс олмоқда. “Янги Ўзбекистон” массивлари каби йирик лойиҳалар эса ана шу янгиланишлар руҳига янада кўтаринкилик бағишламоқда.

Суҳбатни “Янги Ўзбекистон” мухбири

Боборавшан ҒОЗИДДИНОВ уюштирди.