Марказ учун Нурафшон шаҳри танлангани бежиз эмас. Бу ерда фаолият юритаётган “Cйбер Университй”да киберхавфсизлик ва ахборот ҳимояси бўйича қарийб 1 минг нафар юқори малакали мутахассис тайёрланмоқда. Энди университет атрофида бутун мамлакат учун намуна бўладиган яхлит инновацион кластер шакллантирилади.
Кластерда киберхавфсизлик, сунъий интеллект, булутли технологиялар ва криптография йўналишларида 6 та замонавий лаборатория, сунъий интеллект дата-маркази ва муҳандислик кластери ташкил этилади. Ҳимояланган компьютерлар, маълумот узатиш қурилмалари ва юқори технологик токенлар ишлаб чиқариш маркази ҳамда дрон ва робототехника учун махсус синов полигони фаолияти йўлга қўйилади.
Осиё тараққиёт банки кўмагида маҳаллий технологияларни тижоратлаштириш ва миллий маҳсулотларни халқаро бозорларга олиб чиқиш платформаси яратилади. Марказ 5 мегаваттли энергетика қувватлари билан таъминланиб, бу ерда 5 мингдан ортиқ юқори малакали иш ўрни ташкил этилади.
