UZCERT хизмати маълум қилишича, олиб борилган ўрганишлар давомида кибержиноятчилар Ўзбекистондаги ташкилотлар ва хўжалик юритувчи субъектларнинг компьютер ҳамда серверларига RDP хизмати орқали рухсатсиз киришга қаратилган оммавий киберҳужумларни амалга ошираётгани аниқланган.

Шунингдек, мазкур ҳужумларни бошқаришда фойдаланилаётган зарарли C2 (Command and Control) инфратузилмасига тегишли бир қатор хорижий IP-манзиллар ҳам аниқланган.

Дастлабки таҳлиллар натижасида айрим ташкилотларнинг ахборот тизимлари зарарлангани, хусусан, сервер ва компьютерларда сақланаётган маълумотлар шифрлангани маълум бўлган. Ҳозирда ушбу ҳолатлар юзасидан қўшимча ўрганиш ва таҳлил ишлари давом эттирилмоқда.

Шу муносабат билан UZCERT барча давлат ташкилотлари ҳамда хўжалик юритувчи субъектларнинг киберхавфсизлик учун масъул ходимларига қуйидаги чораларни зудлик билан кўришни тавсия қилди:

  • зарурат бўлмаса RDP хизматини вақтинча ўчириш ёки интернет орқали тўғридан-тўғри киришни чеклаш;
  • RDP хизматига фақат ишончли IP-манзиллар ёки VPN орқали киришга рухсат бериш, Network Level Authentication (NLA) функциясини ёқиш ва 3389-портни интернетга очиқ қолдирмаслик;
  • администратор ва RDP орқали кириш ҳуқуқига эга фойдаланувчиларнинг паролларини мураккаб паролларга алмаштириш ҳамда кўп омилли аутентификация (MFA)ни жорий этиш;
  • Firewall, IDS/IPS, SIEM, EDR/XDR каби мониторинг воситалари журналларини таҳлил қилиб, шубҳали IP-манзиллар билан боғлиқ фаолликларни аниқлаш;
  • RDP хизматидан фойдаланувчи сервер ва ишчи станцияларни қўшимча текшириш, рухсатсиз кириш ёки янги фойдаланувчи ҳисоблари пайдо бўлган-бўлмаганини ўрганиш;
  • ҳар қандай шубҳали фаоллик юзасидан зудлик билан ички текширув ўтказиш ва ахборот тизимлари мониторингини кучайтириш;
  • зарарланиш аломатлари аниқланса, тегишли ахборот тизимини дарҳол тармоқдан ажратиш, ҳодисанинг тарқалишини чеклаш ҳамда рақамли далилларни сақлаб қолиш;
  • аниқланган киберҳодиса ёки компрометация аломатлари ҳақида белгиланган тартибда UZCERT хизматига зудлик билан хабар бериш.

UZCERT киберхавфсизлик бўйича масъулларга мазкур тавсияларга қатъий амал қилиш орқали эҳтимолий зарарнинг олдини олиш мумкинлигини таъкидлади.