Венесуэлада содир бўлган кучли зилзилалар оқибатида ҳалок бўлганлар сони 1430 нафарга, жароҳатланганлар сони эса 3238 нафарга етди.
Венесуэла Миллий ассамблеяси раиси Хорхе Родригес мамлакатда юз берган икки кучли зилзиладан кейинги вазият юзасидан баёнот берди.
Унинг маълум қилишича, ҳалок бўлганлар сони 1430 нафарга, жароҳатланганлар сони 3238 нафарга етган. Шунингдек, 3142 та оила ўз уй-жойидан айрилган.
Родригес зилзилалардан кейин мамлакатда камида 430 та афтершок (такрорий ер силкинишлари) қайд этилганини билдирди.
АҚШ Геология хизмати (USGS) маълумотига кўра, 24 июнь куни Венесуэлада 39 сония оралиғида магнитудаси 7,2 ва 7,5 бўлган икки бор зилзила содир бўлган, деб хабар берди aa.com.tr.
USGS маълум қилишича, 7,5 магнитудали зилзила Яракуй штатидаги Юмаре шаҳридан жануби-шарққа қараб 23 километр масофада, 7,2 магнитудали зилзила эса шу штатдаги Сан-Фелипе шаҳридан шимоли-шарққа қараб 24 километр масофада қайд этилган.
Юмареда содир бўлган зилзиланинг ўчоғи 10 километр, Сан-Фелипеда кузатилган зилзиланинг ўчоғи эса 21,9 километр чуқурликда жойлашган.
Айни пайтда мамлакат бўйлаб қидирув-қутқарув ишлари давом этмоқда. Расмийлар ҳалок бўлганлар ва жабрланганлар сони янада ортиши мумкинлигини истисно қилмаяпти.
